ការតស៊ូមតិដើម្បីសិទ្ធិស្ត្រីដោយប្រើប្រាស់*ច្បាប់អន្តរជាតិ (Annex A)

វិគី ព័ត៌មាន សុខភាព > សកម្មភាពដើម្បីសុខភាពរបស់ស្ត្រី > ឧបសម្ព័ន្ធ ក ៖ ការតស៊ូមតិដើម្បីសិទ្ធិស្ត្រីដោយប្រើប្រាស់*ច្បាប់អន្តរជាតិ (Annex A)

នៅក្នុងជំពូកនេះ ៖

 

នៅក្នុងជំពូកនេះ ៖

• ឧបសម្ព័ន្ធ ក ៖ ការតស៊ូមតិដើម្បីសិទ្ធិស្ត្រីដោយប្រើប្រាស់*ច្បាប់អន្តរជាតិ (Annex A)
• កិច្ចព្រមព្រៀងសិទ្ធិមនុស្សអន្តរជាតិ

អង្គការសហប្រជាជាតិ(UN) ជាទីប្រមូលផ្តុំស្ទើរគ្រប់រដ្ឋាភិបាលទាំងអស់នៅលើពិភពលោកសម្រាប់ការពិភាក្សាពីបញ្ហាដោះស្រាយជម្លោះនិងបង្កើតសន្ធិសញ្ញាផ្សេងៗបម្រើដល់សុខុមាលភាពមនុស្សលោក។ សេចក្តីប្រកាសជាសកលស្តីពីសិទ្ធិមនុស្សដែលអនុម័តដោយអង្គការសហប្រជាជាតិនៅក្នុងឆ្នាំ១៩៤៨ ចែងថា “មនុស្សទាំងអស់កើតមកមានសេរីភាពនិងមានសិទ្ធិនិងសេចក្តីថ្លៃថ្នូរស្មើៗគ្នា។ មាត្រា២៥ ប្រកាសថាមនុស្សគ្រប់រូបមានសិទ្ធិទទួលបានការថែទាំសុខភាព និងសេវាសង្គមកិច្ចចាំបាច់ផ្សេងៗទៀត។ អង្គការសហប្រជាជាតិបានបង្កើតកិច្ចព្រមព្រៀងដទៃទៀតជាច្រើនដែលផ្តោតសំខាន់លើសិទ្ធិស្ត្រី និងពង្រីកបន្ថែមនូវអ្វីដែលមាននៅក្នុងនោះ។ នៅពេលខ្លះ កិច្ចព្រមព្រៀងទាំងនេះត្រូវបានហៅថាអនុសញ្ញា សន្ធិសញ្ញា កិច្ចសន្យា លិខិតូបករណ៍ ឬកិច្ចព្រមព្រៀង ហើយរាល់ឯកសារទាំងអស់នេះចែងនូវរឿងរ៉ាវតែមួយដូចគ្នាគឺ៖ កំណត់នូវសិទ្ធិនានាដែលស្ត្រីគ្រប់រូបត្រូវមាន ដោយផ្អែកលើច្បាប់អន្តរជាតិ។

នាងម៉ាឡាឡា ជំរុញសមាជិកអង្គការសហប្រជាជាតិលើកកម្ពស់សិទ្ធិអប់រំ

នៅអាយុ១១ឆ្នាំ នាងម៉ាឡាឡា (Malala Yousafzai) បានក្លាយជាសកម្មជនអប់រំម្នាក់នៅពេលដែលនាងបានទាក់ទាញការចាប់អារម្មណ៍ទៅលើស្ថានភាពរបស់ក្មេងស្រីនៅភាគពាយ័ព្យនៃប្រទេសប៉ាគីស្ថាន។ នៅពេលដែលក្មេងស្រីត្រូវបានហាមឃាត់មិនឲ្យចូលរៀននៅក្នុងតំបន់របស់នាង នាងក៏បានចាប់ផ្តើមសរសេរប្លុករៀបរាប់អំពីការរើសអើងដែលនាងនិងស្ត្រីវ័យក្មេងដទៃទៀងកំពុងជួបប្រទះ។ បន្ទាប់ពីមានការបាញ់ប្រហារមកលើរូបនាង (ដោយសារកិច្ចខិតខំប្រឹងប្រែងរបស់នាង) ការខឹងសម្បាជាសាធារណៈបានបញ្ឆេះឲ្យមានជាយុទ្ធនាការអន្តរជាតិមួយដឹកនាំដោយអង្គការសហប្រជាជាតិដើម្បីទាមទារឲ្យមានការទទួលស្គាល់នូវសិទ្ធិទទួលបានការអប់រំរបស់កុមារគ្រប់រូប ដែលត្រូវបានធានានៅក្នុងមាត្រា២៦ នៃសេចក្តីប្រកាសជាសកលស្តីពីសិទ្ធិមនុស្ស។ បន្ទាប់ពីជាសះស្បើយពីរបួស នាងម៉ាឡាឡាបានបន្តការតស៊ូមតិ ហើយនៅក្នុងឆ្នាំ២០១៤ នាងក៏បានក្លាយជាបុគ្គលវ័យក្មេងបំផុតដែលទទួលបានពានរង្វាន់ណូបែលសន្តិភាព។

ទោះបីជាអ្នកមានសម្បុរពណ៌អ្វីក៏ដោយ និយាយភាសាអ្វីក៏ដោយ ប្រតិបត្តិសាសនាអ្វីក៏ដោយ យើងទាំងអស់គ្នាគួរទទួលស្គាល់គ្នាទៅវិញទៅមក ថាយើងសុទ្ធតែជាមនុស្សដូចគ្នា។ យើងគួរគោរពគ្នាទៅវិញទៅមក ហើយយើងទាំងអស់គ្នាគួរតស៊ូដើម្បីសិទ្ធិរបស់យើង ដើម្បីសិទ្ធិរបស់កុមារ ដើម្បីសិទ្ធិរបស់ស្ត្រី ហើយនិងដើម្បីសិទ្ធិរបស់មនុស្សគ្រប់រូប។

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ០៥ មករា ២០២៤