Hesperian Health Guides
ការបង្ហាញចេញជាកាយវិកាបែបច្នៃប្រឌិត
វិគី ព័ត៌មាន សុខភាព > សកម្មភាពដើម្បីសុខភាពរបស់ស្ត្រី > ឧបសម្ព័ន្ធ គ ៖ សកម្មភាពជំរុញការចូលរួម (Annex C) > ការបង្ហាញចេញជាកាយវិកាបែបច្នៃប្រឌិត
មាតិកា
ការបង្រៀនដោយប្រើការសំដែងរឿង
ឈុតឆាកសំដែងរឿង និងការសម្តែងតួ អាចជួយឲ្យសមាជិកក្រុមអនុវត្តវិធីថ្មីៗក្នុងការទំនាក់ទំនងទៅកាន់អ្នកដទៃ។ ការសំដែងអាច ៖
- ភ្ជាប់ទស្សនិកជនទៅនឹងបញ្ហាបែបរំជួលចិត្ត។
- អនុញ្ញាតឲ្យគេពិភាក្សាពីប្រធានបទពិបាកៗតាមវិធីដែលមានសុវត្ថិភាព។
- និយាយទៅកាន់គ្រប់គ្នា ដោយមិនគិតពីសមត្ថភាព ឬកម្រិតវប្បធម៌ឡើយ។
- ជួយគេឲ្យដោះស្រាយបញ្ហាជាក្រុម។
ការសំដែងរឿង និងសកម្មភាពនិទានរឿងក៏អាចត្រូវបានប្រើប្រាស់ដើម្បីអប់រំអ្នកនៅក្រៅក្រុមរបស់អ្នកអំពីបញ្ហាដែលអ្នកកំពុងធ្វើការផងដែរ។ នៅពេលបង្កើតសាច់រឿង ចូរគិតអំពីរបៀបដែលអ្នកចង់ឲ្យទស្សនិកជនរបស់អ្នកមានអារម្មណ៍យ៉ាងណា។ តើអ្វីជាបញ្ហាសំខាន់ដែលអ្នកកំពុងសង្ឃឹមថាស្វែងយល់នៅក្នុងការសំដែងរឿងរបស់អ្នក? តើអ្នកអាចជំរុញទឹកចិត្តទស្សនិកជនរបស់អ្នកឲ្យធ្វើសកម្មភាពដោះស្រាយបញ្ហានោះនៅក្នុងជីវិតផ្ទាល់ខ្លួនរបស់ពួកគេដោយរបៀបណា? ចូរព្យាយាមរកតួអង្គសំដែងដែលទស្សនិកជនរបស់អ្នកនឹងកំណត់អត្តសញ្ញាណបាន ជាតួអង្គដែលនិយាយ រស់នៅ និងស្លៀកពាក់ដូចដែលពួកគេធ្លាប់ធ្វើ។ បញ្ហាដែលតួអង្គរបស់អ្នកជួបប្រទះគួរមានភាពជាក់ស្តែង និងប្រហាក់ប្រហែលនឹងបញ្ហាដែលទស្សនិកជនរបស់អ្នកប្រឈមមុខផងដែរ។ វាបង្កភាពងាយស្រួលច្រើនក្នុងការជំរុញទឹកចិត្តឲ្យមនុស្សចាត់វិធានការ ប្រសិនបើយើងបង្ហាញបញ្ហាដែលដក់ជាប់ក្នុងបេះដូង និងចិត្តរបស់ពួកគេ។ សាច់រឿងអំពីបញ្ហាមិនត្រូវមានភាពសាមញ្ញពេកទេ។ តាមរយៈការបង្ហាញពីភាពស្មុគស្មាញនៃបញ្ហា យើងអាចជំរុញឲ្យក្រុមគិតបានស៊ីជម្រៅអំពីបញ្ហា និងដំណោះស្រាយ។
បង្កើតរឿងសំដែងរបស់អ្នកដោយប្រើប្រាស់វិធីសាស្ត្រ WOW (ចង់ ឧបសគ្គ ឈ្នះ)
ចាប់ផ្តើមការសំដែងរឿងរបស់អ្នកជាមួយនឹង “ចង់” (Want)។ ផ្តល់សាច់រឿង បន្ទាប់មកចែករំលែកគោលបំណង ឬក្តីប្រាថ្នារបស់តួអង្គសំខាន់។
បង្កើតឧបសគ្គ ពីព្រោះវាជួយឲ្យការសំដែងរឿងរបស់អ្នកកាន់តែមានភាពរំភើប និងគួរឲ្យចាប់អារម្មណ៍។
បញ្ចប់ការសំដែងរឿងរបស់អ្នកជាមួយនឹងតួអង្គឈ្នះ ឬចាញ់ក្នុងការខិតខំទាមទាររបស់ពួកគេ!
ដំបូន្មាន
ប្រការមិនគួរធ្វើ ៖
ការសំដែងរឿងអាចនឹងផ្តល់ប្រសិទ្ធភាពខ្ពស់ខ្លាំងណាស់។ ចូរចងចាំចំណុចខាងក្រោមនេះ ៖
- កុំបង្ហាញចំណុចអាក្រក់ ដូចជាឈុតចាប់រំលោភកំពុងកើតឡើងដោយផ្ទាល់ ជំនួសមកវិញគួរនិយាយអំពីអំពើនោះដែលបានកើតឡើងក្រៅឆាក។ (មើលជំពូក ៦ ៖ ការបញ្ចប់ហិង្សាយេនឌ័រ និងសកម្មភាពការសម្តែងតួ៖ អំពើហិង្សាផ្នែកយេនឌ័រប៉ះពាល់ដល់មនុស្សគ្រប់គ្នា)
- កុំស្តីបន្ទោសជនរងគ្រោះ សើចចំអក ឬបង្ហាញឈុតឆាកដែលដាស់អារម្មណ៍ផ្លូវភេទ។
- កុំឲ្យអ្នកសំដែងដើរតួណាដែលអាចនឹងឲ្យពួកគេមានអារម្មណ៍ថាស្តែងខ្លាំងពេក ឬដូចនឹងស្ថានភាពក្នុងជីវិតរបស់ពួកគេខ្លាំងពេក។
ប្រការគួរធ្វើ ៖
- បែងចែកអ្នកសំដែងឲ្យនៅដាច់ពីតួនាទីរបស់ពួកគេ។ និយាយអំពីសាច់រឿងក្រោយពេលសំដែងចប់ ប៉ុន្តែនៅបន្តសំដៅទៅតួអង្គសំដែងដោយហៅឈ្មោះ ឬតួនាទីរបស់ពួកគេនៅក្នុងសាច់រឿង។
- ផ្តល់ពេលវេលាដល់ការសំដែងរឿងឲ្យបានវែងគ្រប់គ្រាន់ដើម្បីសម្រេចនូវគោលបំណងរបស់អ្នក បន្ទាប់មកសឹមកាត់វាចោលខ្លះ។
- ប្រើប្រាស់គ្រឿងតែងឆាក (គ្រឿងដែលតំណាងឲ្យវត្ថុផ្សេងៗ ដូចជា ដាវធ្វើពីក្រដាសកាតុង) ឈុតឆាកកំប្លែង ឈ្មោះបែបកំប្លែងៗ តួនាទីយេនឌ័រដែលផ្លាស់ប្តូរ និងការនិយាយបែបបំផ្លើសឲ្យបានច្រើន!
តន្ត្រី បទចម្រៀង និងការរាំ
 |
ជារឿយៗ តន្ត្រី និងបទចម្រៀងមានឥទ្ធិពលលើអារម្មណ៍របស់មនុស្សជាខ្លាំង។ នៅពេលដែលព័ត៌មាន ឬទស្សនៈត្រូវបានបញ្ចូលទៅក្នុងឃ្លាបទចម្រៀង ពួកវាកាន់តែងាយស្រួលឲ្យមនុស្សចងចាំ និងយកទៅផ្សព្វផ្សាយបន្តដល់អ្នកដទៃ។ ការច្រៀង និងរាំលើកទឹកចិត្តឲ្យមនុស្សចូលរួមសកម្មភាព ធ្វើឲ្យមនុស្សមានអារម្មណ៍ល្អ និងជាវិធីដ៏អស្ចារ្យក្នុងការផ្សព្វផ្សាយពីអំណាចកើនឡើងដែលបានមកពីការខិតខំប្រឹងប្រែងរបស់ក្រុម។ ទន្ទឹមនឹងនេះ តន្ត្រី និងបទចម្រៀងបង្កើតបរិយាកាសរីករាយ! ចម្រៀង និងរបាំអាចផ្លាស់ប្តូរថាមពលនៃកិច្ចប្រជុំ ជួយឲ្យអ្នកទាក់ទាញចំណាប់អារម្មណ៍ទៅលើបទបង្ហាញសាធារណៈ និងប្រមូលផ្តុំមនុស្សមកគាំទ្របុព្វហេតុរបស់អ្នក។ |