ការលាងសម្អាតដៃ

ខ្លឹមសារត្រង់កនែ្លងនេះគឺបានពី ជំពូកជឿនលឿននៃសៀវភៅទីទីណាគ្មានវេជ្បណ្ឌិត

វិធីល្អបំផុតមួយដើម្បីជៀសវាងការឈឺដោយសារមេរោគនិងដង្កូវ គឺត្រូវលាងសម្អាតដៃជាមួយសាប៊ូនិងទឹក។ បើទោះបីជាដៃរបស់អ្នកមើលទៅស្អាតក៏ដោយ, មេរោគនិងពងដង្កូវ អាចមាននៅលើដៃនោះ។ ទាំងនេះអាចធ្វើឲ្យអ្នកឈឺ ប្រសិនបើវាចូលទៅក្នុងមាត់ឬអាហាររបស់អ្នក។

១. បង្ហូរទឹកពីលើដៃរបស់អ្នកដើម្បីឲ្យវាសើម។		២. ប្រើសាប៊ូត្រដុសដៃរបស់អ្នកជាមួយគ្នា។ ការត្រដុសធ្វើឲ្យជ្រុះមេរោគ។ ត្រូវប្រាកដថាដុសត្រកួតនៅចន្លោះម្រាមដៃ និងជុំវិញក្រចកដៃផងដែរ។
៣. បង្ហូរទឹកស្អាតពីលើដៃរបស់អ្នកដើម្បីលាងជម្រះឲ្យបានល្អ។		៤. សម្ងួតដៃរបស់អ្នកជាមួយក្រណាត់ស្អាត។

ល្អបំផុតគួរប្រើសាប៊ូដើម្បីសម្អាតក្អែលនិងមេរោគចេញ។ ប្រសិនបើគ្មានសាប៊ូទេ អ្នកអាចប្រើខ្សាច់ឬផេះជំនួសបាន។

ត្រូវលាងសម្អាតដៃរបស់អ្នកជានិច្ច៖

បន្ទាប់ពីបន្ទោរបង់លាមក ឬការលាងគូថរបស់ទារក។
មុននឹងរៀបចំម្ហូបអាហារឬបរិភោគ។
បន្ទាប់ពីប៉ះពាល់សត្វ។
បន្ទាប់ពីកណ្តាស ឬក្អក។
ប្រសិនបើអ្នកឈឺ។

សុខភាពរបស់អ្នកស្ថិតនៅក្នុងដៃរបស់អ្នក។ ត្រូវលាងសម្អាតវាជាញឹកញាប់។

ដបទឹកបង្ហូរ

ឧបករណ៍សម្រាប់លាងសម្អាតដៃដ៏សាមញ្ញមួយនេះ អនុញ្ញាតឲ្យអ្នកលាងសម្អាតដៃដោយប្រើប្រាស់ទឹកតិចតួចបំផុត។ វាក៏អនុញ្ញាតឲ្យអ្នកត្រដុសដៃទាំងពីរចូលគ្នាផងដែរ ក្នុងពេលដែលទឹកហូរមកពីលើ ដែលធ្វើឲ្យជ្រះមេរោគ។ ចូរដាក់វានៅត្រង់ណាដែលមនុស្សត្រូវការលាងសម្អាតដៃ ដូចជាកន្លែងរៀបចំម្ហូបអាហារ នៅក្នុងបង្គន់ ឬនៅផ្សារ។

វិធីធ្វើដបទឹកបង្ហូរ

ដើម្បីធ្វើដបទឹកបង្ហូរនេះ អ្នកត្រូវការ ១) ដបប្លាស្ទិកមួយដែលមានគម្របមួលបិទ ដូចជាដបសូដាជាដើម, និង ២) បំពង់ដែលជាសំបកប៊ិច ឬបំពង់តូចផ្សេងៗទៀតដែលរឹង និងមានប្រហោង។

១. សម្អាតដប។
២. យកខ្សែលួសដែលបានដុតក្តៅ ចោះរន្ធតូចមួយនៅត្រង់ផ្នែកខាងក្រោមនៃដប។
៣. យកបណ្តូលប៊ិចចេញ រួចសម្អាតផ្នែកខាងក្នុងនៃបំពង់ប៊ិច។ កាត់វាបញ្ឆិតមុខបន្តិច រួចចាក់ទម្លុះដបត្រង់រន្ធលួសនោះ។ បំពង់ប៊ិចគួរតែស្ថិតនៅជាប់យ៉ាងណែន។
៤. ចាក់ទឹកចូលដប រួចបិទគម្រប។ នៅពេលដែលគម្របបិទជិតណែន នោះទឹកមិនហូរចេញតាមបំពង់ប៊ិចទេ។ នៅពេលគម្របដបរលុង ទឹកនឹងហូរចេញតិចៗ។ នៅពេលវាដំណើរការល្អហើយ ដាក់វានៅត្រង់កន្លែងដែលមនុស្សអាចលាងសម្អាតដៃបាន។ ដាក់សាប៊ូនៅក្បែរនោះ ឬចងដុំសាប៊ូទៅនឹងដបទឹក។		៥. ដើម្បីប្រើប្រាស់ដបទឹកបង្ហូរ៖បន្ធូរគម្របដបល្មមត្រឹមតែឲ្យទឹកហូរចេញបាន។ បន្សើមដៃ ដាក់សាប៊ូ រួចត្រដុសដៃចូលគ្នានៅក្រោមទឹករហូតទាល់តែដៃស្អាត។ បិទគម្របនៅពេលរួចរាល់។