សម្រាប់បុគ្គលិកសុខាភិបាល

វិគី ព័ត៌មាន សុខភាព > ទីណាគ្មានវេជ្ជបណ្ឌិត ថ្មី > ការថែទាំសម្រាប់កុមារ > សម្រាប់បុគ្គលិកសុខាភិបាល

ក្នុង​ជំពូក​នេះ

 

ក្នុង​ជំពូក​នេះ

បើអ្នកជាបុគ្គលិកសុខាភិបាល គួរចុះជួបកុមារជាប្រចាំ។ ពេលវេលាងាយស្រួលបំផុតគឺនៅពេលដែលកុមារត្រូវទទួលថ្នាំបង្ការ (មើលជំពូក ថ្នាំបង្ការ), ឬរៀងរាល់ពីរបីខែម្តងក្នុងឆ្នាំទីមួយ បន្ទាប់មកមួយឆ្នាំម្តង។

ចុះជួបកាន់តែញឹកញាប់បើកុមារបង្ហាញសញ្ញានៃបញ្ហាផ្សេងៗ ដូចជាមិនសូវលូតលាស់ជាដើម។ អ្នកក៏គួរតែត្រឡប់ទៅមើលកុមារវិញផងដែរ (ឬប្រាប់ម្តាយឲ្យនាំកុមារមកជួបអ្នក) បន្ទាប់ពីព្យាបាលកុមារដែលឈឺ ដើម្បីមើលថាតើគាត់បានធូរស្រាលហើយឬនៅ ឬក៏ត្រូវការការថែទាំបន្ថែមទៀត។

ការប្រាប់ឲ្យម្តាយនាំកូនមកកាន់គ្លីនិកដើម្បីពិនិត្យសុខភាព អាចនឹងងាយស្រួលសម្រាប់បុគ្គលិកសុខាភិបាល ប៉ុន្តែជួនកាលវាប្រសើរជាងបើបុគ្គលិកសុខាភិបាលចុះទៅជួបដល់ផ្ទះរបស់ក្រុមគ្រួសារ។ វាជាចំណុចល្អបំផុតដែលរក្សាទារកទើបកើតនិងកុមារតូចៗឲ្យនៅឆ្ងាយពីអ្នកជំងឺដែលស្នាក់នៅឯគ្លីនិក។ ម្យ៉ាងទៀត ស្ត្រីមួយចំនួនមិនអាចទៅចោលកូនផ្សេងទៀត ឬចោលការងាររបស់គាត់ឡើយ ដូច្នេះគាត់មិនទៅគ្លីនិកទេ។ ស្ត្រីទាំងនេះត្រូវការជាពិសេសនូវការជួយជ្រោមជ្រែងពីបុគ្គលិកសុខាភិបាលដើម្បីពិនិត្យទារកនិងកុមារតូចៗរបស់ពួកគាត់។

កុមារដែលត្រូវការការមើលថែខ្លាំងបំផុតពីអ្នកនោះ គឺកុមារដែលមិនមកជួបអ្នក។

ក្នុងពេលកុមារលូតលាស់ ចូរបន្តការពិនិត្យសុខភាពរបស់គាត់។ ក្នុងការចុះជួបទាំងនេះ៖

• សួរពីសុខទុក្ខរបស់កុមារ ថាតើសុខភាពរបស់គាត់ល្អធម្មតា និងកំពុងលូតលាស់បានល្អដែរឬទេ។
• មើលកុមារពីក្បាលដល់ចុងជើង។ កុមារដែលមានសុខភាពល្អ មានភាពរវើក និងចាប់អារម្មណ៍លើអ្វីផ្សេង។ ស្បែករបស់គាត់ថ្លា ហើយរាងកាយកំពុងលូតលាស់និងមាំមួន។
• សួរថាតើកុមារញ៉ាំអាហារយ៉ាងដូចម្តេច។ ជំរុញឲ្យម្តាយបំបៅដោះកូន និងផ្តល់អាហារបំប៉ន។
• ថ្លឹងកុមារ។ ឬបើម្តាយបានចូលរួមនៅក្នុងកម្មវិធីតាមដានការលូតលាស់របស់កុមារ ចូរពិនិត្យមើលកំណត់ត្រាអំពីការលូតលាស់របស់កុមារ (នៅលើ តារាងវិថីឆ្ពោះទៅកាន់សុខភាព ឬប័ណ្ណទាំងឡាយណាដែលមានកត់ត្រាពីទម្ងន់របស់កុមារ)។
• មើលថាតើកុមារមានអនាម័យខ្លួនប្រាណល្អ និងផ្ទះសម្បែងស្អាតឬទេ។ ការចុះជួបនេះក៏អាចជាឱកាសដើម្បីបង្រៀនក្រុមគ្រួសារពីសុវត្ថិភាព និងការបង្ការជំងឺផងដែរ, ឬដើម្បីស្វែងយល់ថាតើពួកគាត់ត្រូវការជំនួយអ្វីខ្លះដើម្បីធ្វើឲ្យផ្ទះរបស់គាត់សុវត្ថិភាពខ្ពស់ និងកូនៗមានសុខភាពប្រសើរ។
• ចូរចែករំលែកនូវអ្វីដែលអ្នកបានដឹង ជាមួយម្តាយនិងក្រុមគ្រួសារ។

ការថែទាំកុមារគឺជាមធ្យោបាយមួយសម្រាប់ឲ្យបុគ្គលិកសុខាភិបាលទទួលបានការទុកចិត្តនិងការគោរពពីសហគមន៍របស់គាត់។ នៅពេលឪពុកម្តាយមើលឃើញអ្នកថែទាំកូនៗរបស់ពួកគាត់ គាត់នឹងមានអារម្មណ៍មិនទើសទាល់ក្នុងការសួរពីបញ្ហាសុខភាពផ្ទាល់ខ្លួនរបស់គាត់ដែរ។ ការពិនិត្យសុខភាពនិងការលូតលាស់របស់កុមារជាប្រចាំ ក៏ជាមធ្យោបាយមួយដើម្បីធានាថាម្តាយនិងសមាជិកគ្រួសារក៏មានសុខភាពល្អ និងទទួលបានការយកចិត្តទុកដាក់ដែលពួកគាត់ត្រូវការផងដែរ។

ចូរឆ្លៀតឱកាសនេះបង្រៀនកុមារអំពីបញ្ហាសុខភាព។ កុមារនិយាយពីអ្វីគ្រប់យ៉ាងដែលពួកគេបានដឹង ប្រាប់ដល់ក្រុមគ្រួសារនិងមិត្តភក្តិរបស់ខ្លួន។ ពួកគេអាចជួយបង្កើតឲ្យមានទម្លាប់សុខភាពនៅក្នុងសហគមន៍បាន។

កុមារដែលកំពុងលូតលាស់ ជាកុមារដែលមានសុខភាពល្អ

កត់ត្រាការលូតលាស់របស់កុមារនៅលើតារាងមួយ ដូចខាងក្រោមនេះ។ ម្តាយឬអាណាព្យាបាលគួររក្សាទុកប័ណ្ណលូតលាស់នេះ។ ពន្យល់ពីរបៀបកត់ត្រាដល់ម្តាយ ដើម្បីឲ្យគាត់ដឹងបើកូនរបស់គាត់កំពុងលូតលាស់យឺតយ៉ាវ។ ចុច ត្រង់នេះ ដើម្បីទាញយកតារាងដែលមានគុណភាពអាចបោះពុម្ពបាន។

របៀបប្រើប្រាស់តារាង

ជំហានទី១
សរសេរខែដែលកូនរបស់អ្នកបានកើត, នៅត្រង់នេះតារាងនេះបង្ហាញថាទារកកើតក្នុងខែមេសា។

ជំហានទី២
សរសេរខែដទៃទៀតតាមលំដាប់លំដោយ, បន្ទាប់ពីខែកំណើតរបស់កូនអ្នក។

ជំហានទី៣
រៀងរាល់ខែ ចូរថ្លឹងទម្ងន់របស់កូនគិតជាគីឡូក្រាម។

គូសដៅចំណុចមួយនៅលើតារាងត្រង់កន្លែងនៃទម្ងន់របស់កូន នៅក្នុងខែបច្ចុប្បន្ន។

ជំហានទី៤
ថ្លឹងទម្ងន់របស់កូនជារៀងរាល់ខែ រួចគូសដៅចំណុចមួយនៅលើតារាង។ គូសបន្ទាត់ភ្ជាប់ពីចំណុចមួយទៅចំណុចមួយទៀត។ បើកុមារមានសុខភាពល្អ នោះរៀងរាល់ខែចំណុចដៅថ្មីនឹងស្ថិតនៅខ្ពស់ជាងចំណុចដៅចាស់។

ភាគច្រើននៃកុមារដែលមានសុខភាពល្អ ខ្សែបន្ទាត់ភ្ជាប់ចំណុចដៅទាំងអស់ ស្ថិតនៅចន្លោះខ្សែទាំង២នេះ។

បញ្ហាដែលសំខាន់បំផុតគឺថាកុមារនៅតែបន្តលូតលាស់។

មានន័យថាខ្សែបន្ទាត់មិនរត់ស្មើ។

ឬរត់ចុះក្រោមដូចនេះ។

បើអ្នកសង្កេតឃើញថាកុមារមិនកំពុងបន្តលូតលាស់ទេ ចូរពិនិត្យកុមារឲ្យបានញឹកញាប់។ មើលថាតើអ្នកអាចជួយឲ្យកុមារទទួលបានអាហារបន្ថែមដែរឬទេ។ ពិនិត្យរកជំងឺផ្សេងៗដែលអាចពន្យឺតដល់ការលូតលាស់របស់កុមារ។

ការអភិវឌ្ឍ (ការចេះអ្វីមួយ)

ការអភិវឌ្ឍមានន័យថាតើសមត្ថភាពរបស់កុមារបានលូតលាស់យ៉ាងដូចម្តេច។ របៀបដែលកុមារប្រើប្រាស់រាងកាយរបស់គាត់ និងរបៀបដែលគាត់ប្រាស្រ័យទាក់ទង និងរៀនដោះស្រាយបញ្ហា មានលក្ខណៈដាច់ដោយឡែកពីកុមារដទៃ។ ប៉ុន្តែគាត់គួរតែបន្តអភិវឌ្ឍនជានិច្ច ដោយគ្មានការ “ជាប់គាំង” ទេ។ បើកុមារអភិវឌ្ឍយឺត នោះត្រូវយកចិត្តទុកដាក់បន្ថែម។

ហេតុអ្វីកុមារខ្លះអភិវឌ្ឍយឺតជាងកុមារដទៃ? ជួនកាលវាគ្មានមូលហេតុអ្វីឡើយ មានន័យថាភាពខុសគ្នារវាងមនុស្សម្នាក់ទៅមនុស្សម្នាក់ទៀត គឺជារឿងធម្មតា។ ប៉ុន្តែជំងឺនិងស្ថានភាពខ្វះអាហារូបត្ថម្ភ អាចពន្យឺតដល់ការអភិវឌ្ឍរបស់កុមារ ដែលនេះមិនមែនជារឿងធម្មតាទេ។ ពិការភាពខ្លះអាចប៉ះពាល់ដល់ការអភិវឌ្ឍផងដែរ។ ឧទាហរណ៍ អ្នកប្រហែលជាមិនដឹងថាទារកថ្លង់ភ្លាមនោះទេ។ ប៉ុន្តែអ្នកអាចនឹងសង្កេតឃើញថាគាត់មិនរៀននិយាយទេនៅក្នុងអាយុដែលបងរបស់គាត់បានរៀននិយាយទៅហើយ។ សង្កេតមើលការអភិវឌ្ឍរបស់កុមារ ព្រោះការអភិវឌ្ឍយឺត អាចជាសញ្ញាប្រាប់ថាកុមារមានបញ្ហាសុខភាព ឬពិការភាពដែលត្រូវការការយកចិត្តទុកដាក់។

ទារកអាយុ ៣ខែគួរតែ៖
ញញឹម ប្រតិកម្មនឹងសំឡេងនិងចលនា ឆ្លើយតបនឹងសំឡេងនិងមុខមនុស្សដែលធ្លាប់ស្គាល់ សំឡឹងមើលដៃរបស់ខ្លួន	យំនៅពេលឃ្លាន ឬមិនស្រណុក បៅដោះដោយគ្មានបញ្ហាច្រើន ងើបក្បាលឡើងនៅពេលផ្កាប់ខ្លួន

ទារកអាយុ ៦ខែគួរតែ៖
ងាកក្បាលទៅរកសំឡេង ក្រឡាប់ផ្កាប់ផ្ងារទៅមក	ស្គាល់មុខមនុស្សដែលធ្លាប់ឃើញ រើសរបស់របរឡើង រួចដាក់ចូលមាត់

ទារកអាយុ ១ឆ្នាំគួរតែ៖
យល់និងត្រាប់តាមសំឡេងនិងពាក្យស្រួលៗ លេងប្រឡែង ដូចជាបិទពួន ជាដើម	ព្យាយាមដាក់វត្ថុចូលគ្នា ក្រោកអង្គុយ និងវារដោយខ្លួនឯង តោងឈរ

'កុមារអាយុ ៣ឆ្នាំគួរតែ៖
យល់និងនិយាយប្រយោគងាយៗ ធ្វើការងារតូចៗដូចជាបោសជូត សង្កេតមើលអារម្មណ៍របស់អ្នកដទៃ	តម្រៀបវត្ថុផ្សេងៗ រត់ លោត និងតោង

បើកុមារអភិវឌ្ឍយឺតយ៉ាវ អ្នកអាចធ្វើរឿង ២យ៉ាងដើម្បីជួយដល់គាត់៖

1. ១. សុំបុគ្គលិកសុខាភិបាលឲ្យពិនិត្យរកមើលមូលហេតុវេជ្ជសាស្ត្រណាមួយដែលធ្វើឲ្យកុមារអភិវឌ្ឍយឺតយ៉ាវ។
2. ២. ផ្តល់ការយកចិត្តទុកដាក់បន្ថែមដល់កុមារ លើផ្នែកណាដែលគាត់អភិវឌ្ឍយឺតយ៉ាវ។

ជួយកុមារឲ្យលូតលាស់លើចំណុចដែលគាត់កំពុងអភិវឌ្ឍយឺតយ៉ាវ។

មើល ឧបសម្ព័ន្ធ កអំពីតារាងទាំងអស់នៃការអភិវឌ្ឍរបស់កុមារ។ តារាងទាំងនេះមានសារសំខាន់ចំពោះទាំងឪពុកម្តាយនិងបុគ្គលិកសុខាភិបាល សម្រាប់កត់ត្រានូវការអភិវឌ្ឍរបស់កុមារ ព្រមទាំងជួយគាំទ្រដល់ពួកគេផងដែរ។

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ០៣ មេសា ២០១៩