ការរៀនសូត្រពីសញ្ញាគ្រោះថ្នាក់

វិគី ព័ត៌មាន សុខភាព > សកម្មភាពដើម្បីសុខភាពរបស់ស្ត្រី > ជំពូក ៨ ៖ ផ្ទៃពោះប្រកបដោយសុខភាព និងការសម្រាលកូនដោយសុវត្ថិភាព > ការរៀនសូត្រពីសញ្ញាគ្រោះថ្នាក់

នៅក្នុងជំពូកនេះ ៖

 

នៅក្នុងជំពូកនេះ ៖

• ជំពូក ៨ ៖ ផ្ទៃពោះប្រកបដោយសុខភាព និងការសម្រាលកូនដោយសុវត្ថិភាព
• មាតុភាពគ្មានគ្រោះថ្នាក់ ចាប់ផ្តើមនៅមុនពេលមានផ្ទៃពោះ
• ការថែទាំល្អក្នុងអំឡុងពេលមានផ្ទៃពោះ
• ហេតុអ្វីស្ត្រីស្លាប់ក្នុងពេលមានផ្ទៃពោះនិងពេលសម្រាលកូន?
• កែលម្អលទ្ធភាពទទួលបានការថែទាំសម្រាប់ស្ត្រីមានផ្ទៃពោះ
• ការរួមបញ្ចូលបុរសទៅក្នុងមាតុភាពគ្មានគ្រោះថ្នាក់
• ការរៀនសូត្រពីសញ្ញាគ្រោះថ្នាក់
• ដំណោះស្រាយសហគមន៍ដើម្បីធ្វើឲ្យការសម្រាលកូនកាន់តែមានសុវត្ថិភាព

ជីវិតស្ត្រីកាន់តែច្រើននឹងត្រូវបានជួយសង្គ្រោះ ប្រសិនបើគ្រប់គ្នាដឹងពីសញ្ញាដែលមានន័យថា ជីវិតរបស់ស្ត្រីអាចស្ថិតក្នុងគ្រោះថ្នាក់ នៅអំឡុងពេលមានផ្ទៃពោះ ពេលសម្រាល ឬ២សប្តាហ៍ក្រោយសម្រាល។ ការរៀនសូត្រពីគ្រោះថ្នាក់គឺជាផ្នែកមួយដ៏សំខាន់នៃការត្រៀមរៀបចំសម្រាប់ភាពអាសន្ន។

សញ្ញាគ្រោះថ្នាក់អំឡុងពេលមានផ្ទៃពោះ

ជូនស្ត្រីទៅមណ្ឌលសុខភាពឬមន្ទីរពេទ្យឲ្យបានឆាប់រហ័ស ប្រសិនបើគាត់មាន៖

ធ្លាក់ឈាមពីទ្វារមាស។ ក្នុងផ្ទៃពោះដើមខែ វាអាចជាសញ្ញានៃការរលូតកូន ឬនៅចុងខែនៃផ្ទៃពោះ អាចជាសញ្ញានៃការរបេះសុកពីស្បូន។
	ឈឺចាប់ខ្លាំងក្នុង ៣ខែដំបូង ដោយមានឬគ្មានធ្លាក់ឈាម។ នេះអាចបណ្តាលមកពីគភ៌លូតលាស់នៅក្រៅស្បូន។ វាអាចសម្លាប់ស្ត្រីបាន។
សញ្ញានៃការឆ្លងរោគ (គ្រុនក្តៅ ញាក់ ក្លិនអាក្រក់ពីទ្វារមាស)។ ការបង្ករោគនៅក្នុងស្បូន មានគ្រោះថ្នាក់ខ្លាំងណាស់។ ត្រូវតែព្យាបាលវា ព្រោះស្ត្រីអាចនឹងស្លាប់។ ហើមមុខនិងដៃ ឈឺក្បាលខ្លាំង ឬវិលមុខ។ បញ្ហាទាំងនេះ រួមជាមួយសម្ពាធឈាមខ្ពស់ គឺជាសញ្ញានៃបម្រុងក្រឡាភ្លើង។ បម្រុងក្រឡាភ្លើងអាចសម្លាប់ស្ត្រីបាន។
	ការប្រកាច់ (ក្រឡាភ្លើង)។ ស្ត្រីមានផ្ទៃពោះដែលប្រកាច់ ឬដែលសន្លប់ ត្រូវការជំនួយវេជ្ជសាស្ត្រជាបន្ទាន់ដើម្បីជួយសង្គ្រោះជីវិត។

នៅរដ្ឋអូសាកា នៃប្រទេសម៉ិកស៊ីកូ មនុស្សគ្រប់គ្នាស្តាប់វិទ្យុ ដូច្នេះក្រុមការងារមាតុភាពគ្មានគ្រោះថ្នាក់បានបង្កើតជាល្ខោនភាគខ្លី។ ក្នុងភាគនីមួយៗ និយាយអំពីសញ្ញាគ្រោះថ្នាក់ផ្សេងៗគ្នា ហើយគ្រប់ពេល ក្រុមគ្រួសារឬអ្នកជិតខាងតែងតែនាំស្ត្រីទៅមន្ទីរពេទ្យដើម្បីសង្គ្រោះជីវិត។ ល្ខោនវិទ្យុបញ្ចប់ទៅដោយការផ្តល់ដំបូន្មានអំពីរបៀបទទួលបានផ្ទៃពោះប្រកបដោយសុខភាព។

សញ្ញាគ្រោះថ្នាក់អំឡុងពេលឈឺពោះសម្រាល និងពេលសម្រាល

ស្ត្រីដែលមានសញ្ញាគ្រោះថ្នាក់ក្នុងពេលឈឺពោះសម្រាល ត្រូវការបញ្ជូនទៅមន្ទីរពេទ្យក្នុងរយៈពេលក្រោម ២ម៉ោង បើមិនដូច្នេះទេម្តាយឬទារកអាចនឹងស្លាប់។ សញ្ញាគ្រោះថ្នាក់មួយចំនួនមានដូចជា ៖

	ការធ្លាក់ឈាមធ្ងន់ធ្ងរ។ ការធ្លាក់ឈាមខ្លាំងភ្លាមៗ ឬការហូរឈាមតិចៗជាប់ជាបន្ត មានគ្រោះថ្នាក់ខ្លាំងណាស់។ សមាជិកគ្រួសារ២នាក់ គួរទៅមន្ទីរពេទ្យជាមួយស្ត្រី ក្នុងករណីត្រូវការបញ្ចូលឈាម។
ឈឺចាប់ខ្លាំងជាប់ជានិច្ចនៅក្នុងពោះ ខុសពីការកន្ត្រាក់ស្បូនពេលឈឺពោះ។ នេះអាចមានន័យថា សុកកំពុងរបេះពីស្បូន ដែលអាចសម្លាប់ម្តាយឬទារក។
ឈឺក្បាលធ្ងន់ និងប្រកាច់។ នេះជាសញ្ញានៃក្រឡាភ្លើង។ ស្ត្រីត្រូវការជំនួយវេជ្ជសាស្ត្រជាបន្ទាន់។ ឈឺពោះសម្រាលរយៈពេលយូរ។ ការឈឺពោះសម្រាលខ្លាំង យូរជាង១ថ្ងៃ ឬ១យប់(១២ម៉ោង) ឬការប្រឹងបញ្ចេញយូរជាង ២ម៉ោង ហើយនៅតែគ្មានសញ្ញាថាទារកនឹងកើត គឺជាសញ្ញានៃការឈឺពោះសម្រាលអូសបន្លាយ ដែលអាចសម្លាប់ទាំងម្តាយនិងទារក។
	ដៃឬជើងទារកចេញមកមុន។ នេះមានន័យថាទារកកំពុងស្ថិតក្នុងទីតាំងខុស។

បែកទឹកភ្លោះ ប៉ុន្តែមិនទាន់ចាប់ផ្តើមឈឺពោះ។ ដើម្បីបង្ការការបង្ករោគ ការសម្រាលគួរកើតឡើងក្នុងអំឡុង២៤ម៉ោង បន្ទាប់ពីបែកទឹកភ្លោះ។ ត្រូវស្វែងរកជំនួយវេជ្ជសាស្ត្រប្រសិនបើស្ត្រីបែកទឹកភ្លោះយូរជាង១២ម៉ោង ហើយមិនឈឺពោះ។
ទឹកភ្លោះពណ៌បៃតង ឬពណ៌ត្នោត។ មានន័យថាទារកបញ្ចេញលាមកនៅក្នុងស្បូន។ ទារកប្រហែលជាមានពិបាកដកដង្ហើម ឬឆ្លងរោគព្រោះលាមកចូលទៅក្នុងមាត់។

សញ្ញាគ្រោះថ្នាក់ក្រោយពេលសម្រាលកូន

សញ្ញាគ្រោះថ្នាក់អាចបង្ហាញឡើងគ្រប់ពេល ក្នុងអំឡុង២សប្តាហ៍ដំបូងក្រោយសម្រាល។ វាមានដូចជា៖

ធ្លាក់ឈាមធ្ងន់ធ្ងរ ឬហូរឈាមជាប់ជានិច្ច។ វាអាចបណ្តាលមកពីការរហែកនៅក្នុងទ្វារមាសឬស្បួន ប៉ុន្តែមូលហេតុញឹកញាប់បំផុតនៃការធ្លាក់ឈាមធ្ងន់ធ្ងរក្រោយសម្រាល គឺដោយសារសំណល់សុក។ វាកើតឡើងនៅពេលដែលសុក ឬសូម្បីតែកំទេចតូចមួយនៃសុក នៅសេសសល់ក្នុងស្បូន។

សញ្ញានៃការបង្ករោគ (គ្រុនក្តៅ ញាក់ ក្លិនអាក្រក់ពីទ្វារមាស)។ ការបង្ករោគក្នុងស្បូន គឺគ្រោះថ្នាក់ខ្លាំងណាស់។ ត្រូវតែព្យាបាលវា បើមិនដូច្នេះទេ ស្ត្រីអាចនឹងលែងមានកូនបន្ទាប់ទៀត ឬគាត់អាចនឹងស្លាប់។

វិលមុខ ខ្សោយ ចង្អោរ សន្លប់។ ជាប្រការធម្មតា គឺស្ត្រីតែងតែអស់កម្លាំងខ្លាំងបន្ទាប់ពីសម្រាលរួច ប៉ុន្តែបើគាត់វិលមុខឬឈឺ នោះគាត់ប្រហែលជាមានហូរឈាមនៅខាងក្នុង។

ឈឺក្បាលធ្ងន់ធ្ងរ និងប្រកាច់ (ក្រឡាភ្លើង) ក៏អាចកើតឡើងផងដែរក្រោយពេលសម្រាលកូនរួច។ ត្រូវរកជំនួយវេជ្ជសាស្ត្រជាបន្ទាន់។

ខ្ញុំមិនអាចបញ្ឈប់ការធ្លាក់ឈាមបានទេ។ យើងត្រូវទៅមន្ទីរពេទ្យ។

ខ្ញុំទៅដាស់ប្អូនប្រុសខ្ញុំសិន ឲ្យគាត់ជួយបើកបរ។

ម៉ែមើលកូនឲ្យ

ប្រញាប់ឡើង!

សកម្មភាព

ល្បែងទស្សន៍ទាយដោយប្រើការសម្តែងខ្លី៖ វាជាភាពអាសន្ន!

ល្បែងនេះជាមធ្យោបាយដ៏សប្បាយដើម្បីឲ្យក្រុមរៀនសូត្រពីសញ្ញាគ្រោះថ្នាក់សម្រាប់ភាពអាសន្នក្នុងអំឡុងពេលមានផ្ទៃពោះ ពេលសម្រាល និង២សប្តាហ៍ក្រោយសម្រាល។

ដើម្បីរៀបចំ៖
ផ្តល់សញ្ញាគ្រោះថ្នាក់សញ្ញាគ្រោះថ្នាក់ រួចប្រាប់ពួកគេឲ្យត្រៀមរៀបចំការសម្តែងខ្លី ដើម្បីបង្ហាញពីសញ្ញាគ្រោះថ្នាក់នោះ។ ពន្យល់ថា អ្នកដៃក្នុងក្រុមត្រូវសង្កេតមើលការសម្តែង រួចទាយថាតើសញ្ញាគ្រោះថ្នាក់នោះជាអ្វី។ លើកទឹកចិត្តឲ្យពួកគេប្រើប្រាស់សម្ភារតុបតែងតួ (ដូចជា ស្រោមដៃញាត់សំឡី ដើម្បីតំណាងឲ្យដៃហើម, គូសហ្វឺតពណ៌ក្រហម ដើម្បីតំណាងឲ្យឈាម, ឬក្រណាត់មួយដុំ ដើម្បីតំណាងឲ្យទារកទើបកើត)។ ពួកគេអាចអញ្ជើញអ្នកដទៃឲ្យរួមសម្តែងជាមួយខ្លួន។

ដើម្បីលេង៖
មនុស្សម្នាក់ៗធ្វើការសម្តែងខ្លី រីឯអ្នកដទៃក្នុងក្រុម ជាអ្នកសង្កេតមើល។ នៅពេលការសម្តែងបានបញ្ចប់ ចូរសួរអ្នកដទៃក្នុងក្រុម ឲ្យទាយថាតើសញ្ញាគ្រោះថ្នាក់អ្វីដែលត្រូវបានបង្ហាញក្នុងការសម្តែង។ ប្រសិនបើក្រុមត្រូវការព័ត៌មានបន្ថែម ពួកគេអាចសួរសំណួរ ហើយអ្នកសម្តែងអាចឆ្លើយថា “បាទ/ចា៎” ឬ “ទេ។ នៅពេលដែលក្រុមបានទាយត្រូវ ឲ្យគ្រប់គ្នាទះដៃសរសើរ ហើយអរគុណអ្នកសម្តែង។

បន្តការលេងរហូតគ្រប់គ្នាបានសម្តែង។

តើមុខរបស់អ្នកហើមដែរទេ?

តើវាជាបម្រុងក្រឡាភ្លើងត្រូវទេ?

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ២៧ មិថុនា ២០១៨