Hesperian Health Guides

កងដាក់ក្រោមស្បែក និងថ្នាំចាក់ពន្យារកំណើត

ខ្លឹមសារ​ត្រ​ង់ក​នែ្ល​ង​នេះ​គឺ​បាន​ពី ជំពូកជឿនលឿននៃសៀវភៅទីទីណាគ្មានវេជ្បណ្ឌិត

ក្នុង​ជំពូក​នេះ

ដូចគ្នានឹងថ្នាំគ្រាប់តូចដែរ កងដាក់ក្រោមស្បែក និងថ្នាំចាក់ពន្យារកំណើត មានតែអ័រម៉ូនប្រូសេស្ទីន ប៉ុណ្ណោះ, ប៉ុន្តែស្ត្រីមិនចាំបាច់ត្រូវចងចាំថាលេបថ្នាំរាល់ថ្ងៃនោះទេ។ កងដាក់ក្រោមស្បែកនិងថ្នាំចាក់ពន្យារកំណើត ងាយនឹងរក្សាភាពឯកជន។ ទាំងកងដាក់ក្រោមស្បែកនិងថ្នាំចាក់ពន្យារកំណើត គឺមិនអាចបង្ការជំងឺកាមរោគបានទេ រួមទាំងមេរោគអេដស៍ផងដែរ។

កងដាក់ក្រោមស្បែកកំពុងត្រូវបានស៊កបញ្ចូល

របៀបប្រើប្រាស់កងដាក់ក្រោមស្បែកឬថ្នាំចាក់ពន្យារកំណើត

កងដាក់ក្រោមស្បែក គឺជាបំពង់ប្លាស្ទិកតូចមួយដែលបុគ្គលិកសុខាភិបាលដាក់វាទៅក្រោមស្បែកផ្នែកខាងក្នុងនៃដើមដៃរបស់ស្ត្រី។ វាបង្ការមិនឲ្យមានផ្ទៃពោះរយៈពេល ៣ទៅ៥ឆ្នាំ អាស្រ័យលើប្រភេទនៃកងដាក់ក្រោមស្បែក។

NWTND FP Page 15-2.png
សឺរ៉ាំងនិងថ្នាំចាក់ពន្យារកំណើត

ថ្នាំចាក់ពន្យារកំណើតត្រូវបានផ្តល់ដោយបុគ្គលិកសុខាភិបាល មួយដងរៀងរាល់ ១, ២, ឬ៣ខែ អាស្រ័យលើប្រភេទនៃថ្នាំចាក់។

កងដាក់ក្រោមស្បែក និងថ្នាំចាក់ពន្យារកំណើត ងាយនឹងរក្សាភាពឯកជន ហើយស្ត្រីមិនចាំបាច់ត្រូវចងចាំថាលេបថ្នាំរៀងរាល់ថ្ងៃនោះទេ។ កងដាក់ក្រោមស្បែកទាំងអស់និងថ្នាំចាក់ខ្លះ គឺមានតែអ័រម៉ូនប្រូសេស្ទីនប៉ុណ្ណោះ។ ថ្នាំចាក់មួយប្រភេទ (ថ្នាំចាក់ប្រចាំខែ) មានទាំងអ័រម៉ូនប្រូសេស្ទីននិងអេស្ត្រូហ្សែន, ដូច្នេះស្ត្រីដែល មិនអាចប្រើថ្នាំគ្រាប់ដែលមានអ័រម៉ូនផ្សំ មិនគួរប្រើថ្នាំចាក់ប្រភេទនេះទេ។ ស្ត្រីអាចសម្រេចចិត្តឈប់ប្រើថ្នាំចាក់ ឬដោះកងដាក់ក្រោមស្បែកចេញ បានគ្រប់ពេល ប្រសិនបើគាត់ចង់មានផ្ទៃពោះ។ ទាំងកងដាក់ក្រោមស្បែកនិងថ្នាំចាក់ពន្យារកំណើត គឺមិនអាចបង្ការជំងឺកាមរោគបានទេ រួមទាំងមេរោគអេដស៍ផងដែរ។

ផលរំខានដែលអាចកើតមាននៃកងដាក់ក្រោមស្បែកនិងថ្នាំចាក់ពន្យារកំណើត

ថ្នាំ​ចាក់​ប្រចាំខែអាចមាន​ផល​រំខាន​ស្រដៀង​គ្នា​នឹង ថ្នាំ​គ្រាប់​មាន​អ័រម៉ូន​ផ្សំ ដែរ។ កង​ដាក់​ក្រោម​ស្បែក​និង​ថ្នាំ​ចាក់​ដែល​មានតែ​ប្រូ​សេ​ស្ទី​ន មាន​ផល​រំខាន​ដូចគ្នា​នឹង ថ្នាំ​គ្រាប់​តូច​ដែល​មានតែ​ប្រូ​សេ​ស្ទី​ន ដែរ។

ថ្នាំពេទ្យដែលប្រតិកម្មជាមួយកងដាក់ក្រោមស្បែកនិងថ្នាំចាក់ពន្យារកំណើត

ថ្នាំ Rifampicin (ថ្នាំជំងឺរបេង) និងថ្នាំជំងឺឆ្កួតជ្រូកខ្លះ ធ្វើឲ្យកងដាក់ក្រោមស្បែកនិងថ្នាំចាក់ពន្យារកំណើត មិនសូវមានប្រសិទ្ធភាព។ បើអ្នកលេបថ្នាំទាំងនេះ ចូរប្រើមធ្យោបាយផែនការគ្រួសារផ្សេងវិញ។ ស្ត្រីដែលប្រើអាំងស៊ុយលីនសម្រាប់ជំងឺទឹកនោមផ្អែម អាចនឹងត្រូវកែសម្រួលដូសអាំងស៊ុយលីន បន្ទាប់ពីចាប់ផ្តើមប្រើប្រាស់កងដាក់ក្រោមស្បែកឬថ្នាំចាក់ពន្យារកំណើត។

ការបញ្ចប់កងដាក់ក្រោមស្បែកឬថ្នាំចាក់ពន្យារកំណើត

ដើម្បីបញ្ឈប់ការប្រើប្រាស់កងដាក់ក្រោមស្បែក អ្នកត្រូវឲ្យបុគ្គលិកសុខាភិបាលដែលឆ្លងកាត់ការបណ្តុះបណ្តាល ដកវាចេញ។ ស្ត្រីអាចមានផ្ទៃពោះភ្លាមៗបន្ទាប់ពីដកកងក្រោមស្បែកចេញ។ ដើម្បីបញ្ឈប់ការប្រើប្រាស់ថ្នាំចាក់ពន្យារកំណើត នោះគ្រាន់តែឈប់ចាក់ថ្នាំប៉ុណ្ណោះ។ វាត្រូវការពេលយូរជាងសម្រាប់ឲ្យស្ត្រីមានផ្ទៃពោះក្រោយពីឈប់ប្រើថ្នាំចាក់ ប៉ុន្តែស្ត្រីភាគច្រើនអាចមានផ្ទៃពោះក្នុងអំឡុងមួយឆ្នាំ។


Create your own user feedback survey

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ៣០ មករា ២០១៨