ការបរិភោគអាហារចម្រុះ

វិគី ព័ត៌មាន សុខភាព > ទីណាគ្មានវេជ្ជបណ្ឌិត ថ្មី > អាហារល្អធ្វើឲ្យមានសុខភាពល្អ > ការបរិភោគអាហារចម្រុះ

ក្នុង​ជំពូក​នេះ

 

ក្នុង​ជំពូក​នេះ

នៅប្រទេសជាច្រើនទូទាំងពិភពលោក មនុស្សជាច្រើនបរិភោគអាហារចម្បងមួយមុខដែលមានតម្លៃទាប ស្ទើរតែរាល់ពេលបរិភោគ។ អាហារចម្បងនេះផ្តល់ថាមពលគ្រប់គ្រាន់សម្រាប់មួយថ្ងៃ។ ប៉ុន្តែអាហារចម្បងតែឯង គឺមិនគ្រប់គ្រាន់សម្រាប់ឲ្យមនុស្សម្នាក់មានសុខភាពល្អនោះទេ។ ដើម្បីលូតលាស់ រឹងមាំ មានកម្លាំង និងប្រយុទ្ធនឹងជំងឺ យើងត្រូវតែបរិភោគអាហារដទៃទៀតផងដែរ។

បបរធម្មតាគឺមិនគ្រប់គ្រាន់ទេ។	ចូរបន្ថែមសណ្តែក សាច់ សារធាតុទឹកដោះគោ ស៊ុត បន្លែ ឬផ្លែឈើ។

ដើម្បីសុខភាព យើងត្រូវការ៖

ធញ្ញជាតិជាច្រើន ឬបន្លែផ្លែឈើជាតិម្សៅ ផ្តល់ថាមពល

អាហារប្រូតេអ៊ីនដែលផ្តល់កម្លាំង ដូចជាសណ្តែក ស៊ុត ត្រី ឬសាច់

បន្លែនិងផ្លែឈើដែលសម្បូរវីតាមីន ផ្តល់ការការពារ

តាមរយៈការបរិភោគអាហារសុខភាពផ្សេងៗគ្នារៀងរាល់ថ្ងៃ យើងអាចបង្ការបាននូវបញ្ហាសុខភាពធ្ងន់ធ្ងរជាច្រើន។

អាហារជាតិម្សៅ ផ្តល់ថាមពលដល់យើង

ជាអាហារបំពេញរាងកាយ អាហារជាតិម្សៅផ្តល់ឲ្យរាងកាយយើងនូវថាមពលភាគច្រើនដែលចាំបាច់សម្រាប់ធ្វើការងារ និងដើម្បីថែទាំខ្លួនឯងនិងក្រុមគ្រួសារ។ អាស្រ័យលើតំបន់ដែលអ្នករស់នៅ អាហារចម្បងអាចជា៖

បាយ ពោត ស្រូវសាឡី ក្តួច

ផ្លែសាកេ ចេក ដំឡូង ដំឡូងជ្វា

ស្រូវមីយេ ឬធញ្ញជាតិដទៃទៀត បន្លែឫស ឬផ្លែឈើជាតិម្សៅ

អាហារជាតិម្សៅទាំងនេះត្រូវបានចម្អិនទៅជាបបរ ដុតទៅជានំបុ័ង កិនទៅជាម្សៅស្អិត ឬចម្អិនធម្មតា។

ជ្រើសរើសធញ្ញជាតិក្នុងតំបន់

ប្រសិនបើអ្នកមានជម្រើស នោះគួរជ្រើសរើសធញ្ញជាតិក្នុងតំបន់ ព្រោះវាដុះងាយស្រួល ដោយមិនត្រូវការជីធម្មជាតិដែលមានតម្លៃថ្លៃនោះទេ ហើយវាជាជម្រើស ដែលផ្តល់អាហារូបត្ថម្ភខ្ពស់ទៀងផង។ ពោត ស្រូវ និងស្រូវសាឡី ជាជម្រើសដ៏ល្អ។ ប៉ុន្តែស្រូវមីយេ និងស្ពៅ គឺរឹតតែប្រសើរ ព្រោះវាមានប្រូតេអ៊ីន វីតាមីន និងជាតិរ៉ែច្រើនជាង។

អង្ករ

ប្រសិនបើអ្នកបរិភោគអង្ករជាអាហារចម្បង គួរចម្អិនវាទាំងសម្រូបដើម្បីទទួលបានសុខភាពល្អបំផុត។ ស្រូវសាឡីមិនទាន់កិន និងអង្ករក្រហម សម្បូរសាធាតុបំប៉ន ប៉ុន្តែអង្ករស ឬម្សៅសដែលកិនរួច ផ្តល់តែថាមពលប៉ុណ្ណោះ។

ក្តួច

ក្តួចជាអាហារចម្បងក្នុងតំបន់ខ្លះ ហើយវាមានថាមពលជាច្រើន ប៉ុន្តែមិនសូវមានសារធាតុបំប៉នទេ។ ប្រសិនបើអ្នកហូបក្តួចជាអាហារចម្បង ការសំខាន់គឺត្រូវបន្ថែមអាហារដទៃទៀត ដូចជាត្រីងៀត បន្លែ ឬសណ្តែកជាដើម។ ស្លឹកក្តួចសម្បូរទៅដោយវីតាមីននិងរ៉ែ ហើយអាចបរិភោគនៅពេលចម្អិនរួច។ ក្តួចប្រភេទខ្លះមានរសជាតិល្វីង ព្រោះវាមានកម្រិតជាតិ cyanide (ពុល) ខ្ពស់ ។ យើងអាចកែច្នៃក្តួចល្វីងឲ្យបរិភោគបានដោយសុវត្ថិភាព តាមរយៈដំណើរការដំ កោស ត្រាំទឹក ឬធ្វើឲ្យឡើងជូរ ដើម្បី “សម្អាត” ជាតិពុលចេញ។

ពោត

ប្រសិនបើពោតជាអាហារចម្បងរបស់អ្នក គួរស្ងោរវាជាមួយកំបោរជាមុនសិន ដើម្បីទទួលបានវីតាមីនរបស់វា។

នំបុ័ងនិងមីផលិតពីរោងចក្រ មិនសូវជាល្អទេ

នំបុ័ងស នំក្រៀម និងមីកញ្ចប់ ខ្វះអាហារូបត្ថម្ភដែលឃើញមាននៅក្នុងអាហារចម្បងដែលចម្អិននៅតាមផ្ទះ (ដូចជាបបរ និងធញ្ញជាតិ)។ ហើយជាញឹកញាប់ អាហារកញ្ចប់ទាំងនេះមានជាតិខ្លាញ់ អំបិល និងស្ករច្រើនពេក។

អាហារប្រូតេអ៊ីន ធ្វើឲ្យយើងរឹងមាំ

មនុស្សគ្រប់គ្នាត្រូវការអាហារប្រូតេអ៊ីនដើម្បីកម្លាំង លូតលាស់ និងដើម្បីស្តារសុខភាពឡើងវិញពីជំងឺឬរបួស។ អាហារប្រូតេអ៊ីនរួមមាន៖

• សណ្តែកបារាំង សណ្តែកខៀវ ឬសណ្តែកដទៃទៀត។
• សណ្តែកដី គ្រាប់ផ្លែឈើ និងធញ្ញជាតិ។
• ស៊ុត។
• សាច់គ្រប់ប្រភេទដែលមាននៅក្នុងតំបន់អ្នករស់នៅ៖ សត្វតូចធំ សត្វស្លាប ត្រី ខ្យង ខ្ចៅ លៀស គ្រំ ឬសត្វល្អិត។
• ទឹកដោះគោ ហ្វ្រូម៉ា និងទឹកដោះគោជូរ។

ធញ្ញជាតិមិនទាន់កិន ដូចជាអង្ករសម្រូប និងស្រូវសាឡីទាំងមូល ក៏មានជាតិប្រូតេអ៊ីនខ្លះដែរ។ ម្យ៉ាងទៀត ផ្សិតជាច្រើនក៏មានប្រូតេអ៊ីនខ្លះដែរ។

ដូចនឹងការបរិភោគសាច់ដែរ អ្នកក៏អាចមានសុខភាពល្អដោយការបរិភោគសណ្តែក គ្រាប់ផ្លែឈើ និងអាហារប្រូតេអ៊ីនដទៃទៀតពីរុក្ខជាតិផងដែរ។ ម្យ៉ាងទៀត ប្រូតេអ៊ីនពីរុក្ខជាតិ មានតម្លៃថោកជាងក្នុងការដាំឬទិញ។

យើងចាំបាច់បរិភោគប្រូតេអ៊ីនជាប្រចាំ។ ស្ត្រីមានផ្ទៃពោះ កុមារ មនុស្សចាស់ និងអ្នកដែលកំពុងស្តារសុខភាពពីរបួសឬជំងឺ ត្រូវការអាហារប្រូតេអ៊ីនរៀងរាល់ថ្ងៃ។ ចូរប្រាកដថាមានអាហារផ្តល់កម្លាំងទាំងនេះ សម្រាប់មនុស្សដែលត្រូវការបំផុត។

បន្លែនិងផ្លែឈើ ការពាររាងកាយរបស់យើង

ចូរព្យាយាមបរិភោគផ្លែឈើនិងបន្លែរៀងរាល់ថ្ងៃ។ វាមានវីតាមីននិងជាតិរ៉ែផ្សេងៗដែល៖

• ការពារសរីរាង្គនៅក្នុងរាងកាយរបស់យើង។
• ធ្វើឲ្យភ្នែក ស្បែក ធ្មេញ និងសក់របស់យើង មានសុខភាពល្អ។
• ធ្វើឲ្យការរំលាយអាហាររបស់យើង ដំណើរការយ៉ាងល្អ និងជួយឲ្យយើងមានលាមកធម្មតា។
• ការពារយើងពីជំងឺផ្សេង។

ផ្លែឈើនិងបន្លែដែលដុះនៅក្នុងតំបន់របស់អ្នក ផ្តល់សុខភាពល្អដូចរបស់នាំចូលដែរ។ ហើយជាទូទៅវាមានតម្លៃទាបជាង ឬមិនចាំបាច់ចំណាយប្រាក់ទៀតផង។

ចូរបរិភោគអាហារនិងបន្លែចម្រុះមុខ។ រាល់បន្លែឬផ្លែឈើសុទ្ធតែផ្តល់នូវសុខភាពល្អ រួមទាំង៖

• ឃ្លោក។
• ត្រសក់ស្រូវ។
• ម្រេច និងម្ទេស។
• សណ្តែកបារាំងនិងសណ្តែកខៀវស្រស់។
• ផ្លែប៊ឺរី រួមទាំងប៊ឺរីព្រៃ។
• ស្វាយ ល្ហុង ត្របែក ក្រូច និងផ្លែឈើផ្សេងទៀត។
• បន្លែស្លឹកបៃតង — បន្លែដែលដាំនិងដុះដោយខ្លួនឯង គឺសុទ្ធតែល្អ ក៏ដូចជាស្លឹកនៃបន្លែមើមផ្សេងៗទៀត ដូចជាដំឡូងផ្អែម ឆៃថាវ និងត្រាវ។

បន្លែនិងផ្លែឈើចម្រុះពណ៌ ផ្តល់នូវវីតាមីន និងជាតិរ៉ែកាន់តែប្រសើរ។

បញ្ហានានាដែលកើតឡើងពីកង្វះភាពចម្រុះនៃអាហារ

នៅពេលដែលយើងមិនបរិភោគអាហារចម្រុះផ្សេងៗគ្នាទេ នោះយើងមិនទទួលបានវីតាមីននិងជាតិរ៉ែគ្រប់គ្រាន់ដែលចាំបាច់នោះដែរ។ នេះអាចបណ្តាលឲ្យមានជំងឺ។

ភាពស្លេកស្លាំង និងជាតិដែក

ភាពអស់កម្លាំង ខ្សោយ និងដង្ហើមខ្លី គឺជាញឹកញាប់បណ្តាលមកពីភាពស្លេកស្លាំង ពោលគឺកង្វះជាតិដែកនៅក្នុងឈាម។

ភាពស្លេកស្លាំងកើតឡើងកាន់តែញឹកញាប់ទៅលើស្ត្រី ដែលពួកគេបាត់បង់ជាតិដែកតាមរយៈឈាមរដូវ។ ភាពស្លេកស្លាំងអាចបណ្តាលឲ្យទារកកើតមកមានមាឌតូច និងអាចធ្វើឲ្យការធ្លាក់ឈាមក្នុងពេលសម្រាលកូន កាន់តែមានគ្រោះថ្នាក់។

ការធ្វើតេស្ត៍ឈាមរកអេម៉ូក្លូប៊ីន ធ្វើឡើងដើម្បីពិនិត្យបរិមាណនៃជាតិដែកនៅក្នុងឈាម។

សញ្ញានៃភាពស្លេកស្លាំង

• អញ្ចាញធ្មេញនិងត្របកភ្នែកខាងក្នុង ស្លេកស្លាំង
• ខ្សោយ
• អស់កម្លាំង
• វិលមុខ
• ដង្ហើមខ្លី

ការព្យាបាល និងការបង្ការ

បរិភោគអាហារសម្បូរជាតិដែក៖

• សណ្តែកកួរ សណ្តែកបារាំង
• បន្លែបៃតង និងសារាយសមុទ្រ
• ផ្លែឈើក្រៀម
• ធញ្ញជាតិនិងគ្រាប់ផ្លែឈើ
• សាច់គ្រប់ប្រភេទ រួមទាំងមាន់ ទា ក្ងាន ត្រី ខ្យង ខ្ចៅ លៀស គ្រុំ ឬសត្វតូច

ការចម្អិនក្នុងឆ្នាំងដែក ធ្វើឲ្យមានជាតិដែកទៅក្នុងអាហារ។

សាច់របស់សរីរាង្គ ដូចជាថ្លើម និងបេះដូង, និងអាហារពីឈាម គឺមិនមានតម្លៃថ្លៃទេ ហើយសម្បូរជាតិដែកជាពិសេស។

អ្នកដែលស្លេកស្លាំងខ្លាំង អស់កម្លាំង ឬខ្សោយ ឬអ្នកដែលហូរឈាមច្រើន ប្រហែលជាមានភាពស្លេកស្លាំងធ្ងន់ធ្ងរ ហើយត្រូវការលេប ថ្នាំគ្រាប់ជាតិដែក។

អាហារដែលសម្បូរវីតាមីនសេ អនុញ្ញាតឲ្យរាងកាយយើងទទួលបានជាតិដែកបន្ថែមពីអាហារដែលយើងបរិភោគ។ ដូច្នេះចូរបរិភោគអាហារសម្បូរវីតាមីនសេ ជាមួយនឹងអាហារសម្បូរជាតិដែក ក្នុងអាហារពេលតែមួយ។

វីតាមីនសេត្រូវបានប្រទះឃើញនៅក្នុងបន្លែបៃតងនិងផ្លែឈើភាគច្រើន ដូចជាប៉េងប៉ោះ ក្រូច ល្ហុង ស្វាយ ត្រសក់ស្រូវ និងប៊ឺរី។

ជំងឺខ្វាក់មាន់ និងវីតាមីនអា

កង្វះវីតាមីនអា បណ្តាលឲ្យមើលមិនឃើញច្បាស់ក្នុងស្ថានភាពខ្វះពន្លឺ (ខ្វាក់មាន់) ហើយជាចុងក្រោយគឺខ្វាក់ទាំងស្រុង។ វីតាមីនអាក៏មានភាពចាំបាច់ផងដែរដើម្បីសុខភាពនៃស្បែកនិងឆ្អឹង និងដើម្បីប្រយុទ្ធនឹងជំងឺ។ កុមារនិងស្ត្រីច្រើនតែខ្វះវីតាមីនអាញឹកញាប់ជាងគេ។

នៅពេលដែលអ្នកមិនបានបរិភោគអាហារដែលមានវីតាមីនអាគ្រប់គ្រាន់៖

	ដំបូង មានការពិបាកក្នុងការសំឡឹងមើលក្នុងទីមិនសូវមានពន្លឺ។
	ដំបូង មានការពិបាកក្នុងការសំឡឹងមើលក្នុងទីមិនសូវមានពន្លឺ។ ក្រោយមកទៀត ភ្នែកចាប់ផ្តើមស្ងួត។ ផ្នែកសនៃភ្នែក បាត់បង់ភាពថ្លា និងចាប់ផ្តើមជ្រួញ។ អាចនឹងកើតមានដុំពពុះពណ៌ប្រផេះតូចៗ (Bitot’s spots)។ នៅពេលជំងឺកាន់តែដុនដាប កញ្ចក់ភ្នែកអាចនឹងប្រែស្រអាប់ និងរូង។
	បន្ទាប់មក កញ្ចក់ភ្នែកអាចនឹងប្រែជាទន់ ឬប៉ោងយ៉ាងឆាប់រហ័ស ឬថែមទាំងផ្ទុះទៀតផង។ ជាធម្មតា មិនមានការឈឺចាប់ទេ ប៉ុន្តែអាចបណ្តាលឲ្យខ្វាក់ភ្នែក។

ចូរការពារភ្នែករបស់អ្នក ដោយការបរិភោគអាហារសម្បូរវីតាមីនអាទាំងនេះដែលអាចរកបាននៅក្នុងតំបន់ដែលអ្នករស់នៅ៖

• ភាគច្រើននៃផ្លែឈើនិងបន្លែពណ៌ទឹកក្រូច ដូចជាល្ពៅ ការុត ម្ទេស ត្រសក់ស្រូវ ពណ៌ទឹកក្រូច ល្ហុង ស្វាយ ឬដំឡូងក្រហម
• ភាគច្រើននៃបន្លែពណ៌បៃតង ដូចជាបន្លែស្លឹកបៃតង សណ្តែកបារាំង និងស្លឹកព្រៃដែលអាចហូបបាន
• ថ្លើម
• ស៊ុត

ប្រសិនបើមានសញ្ញាណាមួយនៃការខូចខាតភ្នែកដោយសារកង្វះវីតាមីននេះ ចូរផ្តល់ វីតាមីនអា ជំនួយ (ជាទូទៅជាតំណក់)។ វីតាមីនជំនួយ ក៏អាចផ្តល់ឲ្យកុមារក្នុងអំឡុងយុទ្ធនាការផ្តល់វ៉ាក់សាំង ឬដើម្បីបង្ការកង្វាក់ភ្នែកក្នុងពេលផ្ទុះជំងឺកញ្ជ្រឹលផងដែរ។

ជំងឺពកក និងជាតិអ៊ីយ៉ូដ

ជំងឺពកកគឺជាការហើមនៅលើបំពង់ក ដែលបណ្តាលមកពីកង្វះជាតិអ៊ីយ៉ូដក្នុងរបបអាហារ។ កង្វះជាតិអ៊ីយ៉ូដក្នុងរបបអាហាររបស់ស្ត្រីមានផ្ទៃពោះ អាចបណ្តាលឲ្យទារកមានភាពថ្លង់ និងពិការភាពរាងកាយនិងផ្លូវចិត្តដទៃទៀត។ វាអាចកើតឡើងលើទារក ទោះបីជាម្តាយមិនមានជំងឺពកកក៏ដោយ។

មធ្យោបាយល្អបំផុតក្នុងការបង្ការជំងឺពកកនិងកង្វះជាតិអ៊ីយ៉ូដ គឺត្រូវប្រើអំបិលអ៊ីយ៉ូដ (អំបិលដែលមានដាក់ជាតិអ៊ីយ៉ូដក្នុងដំណាក់កាលផលិត)។ វាបង្ការជំងឺពកកភាគច្រើន និងអាចធ្វើឲ្យជាពីជំងឺពកកផងដែរ។ (គេអាចវះកាត់យកដុំពកដែលចាស់និងរឹងចេញបាន ប៉ុន្តែជាទូទៅគឺមិនចាំបាច់ទេ)។ អ្នកក៏អាចបរិភោគអាហារដែលមានអ៊ីយ៉ូដផងដែរ ដូចជាត្រី ខ្ចៅ ខ្យង គ្រុំ លៀស សារាយសមុទ្រ និងអាហារសមុទ្រដទៃទៀត។ ប៉ុន្តែនៅតំបន់ភ្នំខ្លះ គេមិនអាចទទួលបានជាតិអ៊ីយ៉ូដគ្រប់គ្រាន់ពីអាហារឡើយ។

បិលអ៊ីយ៉ូដមានតម្លៃលើសអំបិលធម្មតាតែបន្តិចបន្តួចប៉ុណ្ណោះ ប៉ុន្តែមានប្រយោជន៍ជាច្រើនសម្រាប់សុខភាពរបស់អ្នក។

ប្រសិនបើអ្នកមិនអាចទទួលបានអំបិលអ៊ីយ៉ូដទេ អ្នកប្រហែលជាត្រូវការ ជាតិអ៊ីយ៉ូដ ជំនួយ។

វីតាមីននិងជាតិរ៉ែផ្សេងទៀត

យើងក៏ត្រូវការវីតាមីននិងជាតិរ៉ែផ្សេងទៀតផងដែរ ដែលទាំងអស់នេះជាទូទៅយើងអាចទទួលបានតាមរយៈការបរិភោគអាហារចម្រុះមុខ។ ការទទួលវីតាមីនជាទៀងទាត់ពីអាហារ (មិនមែនពីគ្រាប់វីតាមីនជំនួយ) គឺជាវិធីដ៏ល្អបំផុតដើម្បីឲ្យរាងកាយរបស់យើងប្រើប្រាស់វាយ៉ាងពេញលេញ។ វីតាមីននិងជាតិរ៉ែសំខាន់បំផុតមួយចំនួន មានរៀបរាប់នៅក្នុងតារាងខាងក្រោមនេះ។

ឈ្មោះវីតាមីនឬជាតិរ៉ែ	អាហារអ្វីខ្លះដែលមានសារជាតិនេះ	ើវាជួយអ្វីខ្លះដល់រាងកាយរបស់យើង	បញ្ហាកើតឡើងបណ្តាលមកពីកង្វះសារជាតិនេះ
ជាតិស័ង្កសី	សាច់ ខ្យង ខ្ចៅ លៀស គ្រុំ សណ្តែក ផលិតផលទឹកដោះគោ ធញ្ញជាតិមិនទាន់កិន (ដូចជាស្រូវមីយេ អង្ករក្រហម ឬស្រូវសាឡី)។).	ចាំបាច់សម្រាប់ការលូតលាស់ ថាមពល ប្រយុទ្ធនឹងជំងឺ និងតួនាទីផ្សេងៗទៀតជាច្រើននៅក្នុងរាងកាយ។	Iបញ្ហាញឹកញាប់គឺជំងឺ។ កុមារមានជំងឺរាកកាន់តែញឹកញាប់ ហើយត្រូវការពេលកាន់តែយូរក្នុងការជាសះស្បើយ។
វីតាមីនបេ	សាច់ ត្រី ថ្លើម ស៊ុត ធញ្ញជាតិមិនទាន់កិនបន្លែ និងអាហារដែលត្រូវបានធ្វើឲ្យឡើងមេ (ដូចជានំបុ័ង)។	ជួយឲ្យកោសិកា សរសៃប្រសាទ សាច់ដុំ និងប្រព័ន្ធភាពស៊ាំរបស់យើង ដំណើរការល្អ។	នៅពេលដែលមាន អាហារតែមួយមុខសម្រាប់បរិភោគក្នុងអំឡុងពេលអត់ឃ្លានខ្លាំង នោះវាអាចបណ្តាលឲ្យខ្វះវីតាមីនបេយ៉ាងធ្ងន់ធ្ងរ ដែលហៅថាជំងឺ pellagra — ជាជំងឺរបកស្បែក រាក និងវង្វេងវង្វាន់។
អាស៊ីតហ្វូលិក	បន្លែស្លឹកបៃតង សណ្តែកកួរ សណ្តែកបារាំង ផ្លែឈើ ផ្លែប៊ឺរ ផ្សិត ថ្លើម។	ត្រូវការជាពិសេសសម្រាប់ស្ត្រី មុននិងអំឡុងពេលមានផ្ទៃពោះ ដើម្បីឲ្យទារកក្នុងផ្ទៃលូតលាស់បានធម្មតា។	ទារកដែលកើតពីម្តាយដែលមិនបានទទួល អាស៊ីដហ្វូលិក គ្រប់គ្រាន់ ងាយនឹងកើតមកមានមាឌតូច ឬមានពិការភាពពីកំណើត,
កាល់ស្យូម	ផលិតផលទឹកដោះគោ សារាយសមុទ្រ បន្លែបៃតងចាស់ គ្រាប់ផ្លែឈើ និងគ្រាប់រុក្ខជាតិ។ កូនត្រីដែលបរិភោគទាំងឆ្អឹង ជាប្រភពល្អ ព្រោះឆ្អឹងគឺជាកាល់ស្យូមស្ទើរតែទាំងស្រុង។ សំបកស៊ុតដែលកិនម៉ត់ល្អ ក៏ជាប្រភពល្អដែរ។	រក្សាឆ្អឹងនិងធ្មេញឲ្យរឹងមាំ។ ជួយដល់សាច់ដុំនិងសរសៃប្រសាទ។ ឆ្អឹងខ្សោយដែលងាយនឹងបាក់។
សារជាតិសរសៃ	សណ្តែក ធញ្ញជាតិមិនទាន់កិន បន្លែនិងផ្លែឈើ គ្រាប់ផ្លែឈើ និងគ្រាប់រុក្ខជាតិ។	នេះមិនមែនជាវីតាមីនឬជាតិរ៉ែទេ ប៉ុន្តែសារជាតិសរសៃជួយធ្វើឲ្យការរំលាយអាហារនិងការបន្ទោរបង់លាមក មានដំណើរការល្អ។	ទល់លាមក និងឈឺពោះ។ កង្វះសារជាតិសរសៃជាច្រើនឆ្នាំ ធ្វើឲ្យងាយកើតមហារីកនិងជំងឺក្រពះពោះវៀន។

ចុះផលិតផលវីតាមីនគ្រាប់ឬថ្នាំចាក់?

ទេ!

មនុស្សមួយចំនួនគិតថា ផលិតផលវីតាមីនគ្រាប់ សេរ៉ូម ឬថ្នាំចាក់ អាចព្យាបាលគ្រប់យ៉ាង រាប់ចាប់ពីភាពអស់កម្លាំង រហូតដល់បញ្ហាផ្លូវភេទ។ នៅពេលទាំងវេជ្ជបណ្ឌិតស្របច្បាប់ និង “វេជ្ជបណ្ឌិតចាក់ថ្នាំ” នាំគ្នាលើកកម្ពស់វីតាមីនថាជាថ្នាំព្យាបាលសព្វមុខ នោះវាធ្វើឲ្យមានបញ្ហាកាន់តែធ្ងន់ធ្ងរ ហើយវាធ្វើឲ្យអ្នកអស់ប្រាក់ពីខ្លួន!

ផ្លែឈើ នឹងទទួលបានវីតាមីនគ្រប់យ៉ាងដែលគាត់ត្រូវការ។ ចូរសន្សំប្រាក់សម្រាប់ទិញអាហារស្រស់ៗវិញ, ជាជាងទិញវីតាមីនជំនួយដែលមានតម្លៃខ្ពស់។

វីតាមីនជំនួយ ជាប្រភេទម្យ៉ាងនៃថ្នាំពេទ្យ។ ក៏ដូចជាថ្នាំពេទ្យដែរ វីតាមីនជំនួយគួរត្រូវបានប្រើតែនៅពេលចាំបាច់ប៉ុណ្ណោះ។ គេត្រូវការវីតាមីនក្នុងករណីមានកង្វះអាហារូបត្ថម្ភធ្ងន់ធ្ងរ ឬក្នុងអំឡុងពេលមានផ្ទៃពោះ នៅពេលដែលរាងកាយរបស់ស្ត្រី ទាមទារកាន់តែខ្លាំង។ ក្រៅពីនេះ គេមិនត្រូវការប្រើប្រាស់វាទេ ហើយវានឹងមិនកែលម្អសុខភាពឬធ្វើឲ្យកុមារលូតលាស់ដែរ។

ចៀសវាងវីតាមីនចាក់។ គេត្រូវការវាតែក្នុងករណីកម្របំផុតនៃកង្វះវីតាមីនធ្ងន់ធ្ងរប៉ុណ្ណោះ។ ហើយត្រូវចៀសវាងការប្រើប្រាស់ម្ជុលឡើងវិញ ព្រោះវាធ្វើឲ្យឆ្លងមេរោគដែលនាំឲ្យកើតអាប់សែ ជំងឺរលាកថ្លើម និងមេរោគអេដស៍។

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ៣០ មករា ២០១៨