អណ្តាតភ្លើងឧស្ម័ន

វិគី ព័ត៌មាន សុខភាព > សៀវភៅណែនាំសម្រាប់សហគមន៍ស្តីអំពីសុខភាពបរិស្ថាន > ២២. ប្រេង ជំងឺ និងសិទ្ធិមនុស្ស > អណ្តាតភ្លើងឧស្ម័ន

នៅក្នុងជំពូកនេ:

 

នៅក្នុងជំពូកនេ:

• ២២. ប្រេង ជំងឺ និងសិទ្ធិមនុស្ស
• ប្រេង និងសុខភាពសហគមន៍
• ប្រេងបង្កបញ្ហាសុខភាពធ្ងន់ធ្ងរ
• គ្រប់ផ្នែកទាំងអស់នៃផលិតកម្មប្រេងសុទ្ធតែមានគ្រោះថ្នាក់
• អណ្តាតភ្លើងឧស្ម័ន
• រោងចក្រស្លប្រេង
• ការកំពប់ប្រេង
• យុត្ថិធម៌ផ្នែកបរិស្ថាន
• ប្រេង និងច្បាប់

នៅពេលប្រេងត្រូវបានខួងមកជាមួយឧស្ម័នធម្មជាតិ ក្រុមហ៊ុនប្រេងអាចដុតឧស្ម័ននោះដើម្បីបំបែកវាចេញពីប្រេង។ ការដុតឧស្ម័នធ្វើឲ្យមានអណ្តាតភ្លើងយក្ខដែលឆេះភ្លឺពេញមេឃ និងបង្កើតសំឡេងលាន់យ៉ាងខ្លាំង។ អណ្តាតភ្លើងឧស្ម័ន មានគ្រោះថ្នាក់ ខ្ជះខ្ជាយ និងពុលជាខ្លាំង។

ក្រុមហ៊ុនប្រេងអាចលក់ឧស្ម័ន ជាជាងការដុតវាចោល។ ប៉ុន្តែបែបនេះកាន់តែត្រូវចំណាយយ៉ាងច្រើន និងមានការពិបាកជាខ្លាំង ព្រោះឧស្ម័នត្រូវរក្សាទុកក្រោមសម្ពាធ ដែលបង្កើនការប្រឈមនឹងការឆាបឆេះនិងផ្ទុះ។ ដូច្នេះក្រុមហ៊ុនប្រេងគ្រាន់តែដុតឧស្ម័ន ជាការស្រេច ព្រោះមិនចាំបាច់ចំណាយច្រើន ទោះបីវាបង្កើនគ្រោះថ្នាក់ដល់ប្រជាជននិងបរិស្ថានក៏ដោយ។

សុខភាពនិងសុវត្ថិភាពជុំវិញអណ្តាតភ្លើងឧស្ម័ន

អណ្តាតភ្លើងឧស្ម័នដែលមានកម្ពស់ខ្ពស់ជាងមនុស្ស គឺមិនសូវមានគ្រោះថ្នាក់ទេ។

អណ្តាតភ្លើងឧស្ម័នដែលមានកម្ពស់ស្មើមនុស្ស ឬអណ្តាតភ្លើងឧស្ម័នដែលមានទិសស្របផែនដី គឺមានគ្រោះថ្នាក់ខ្លាំងណាស់។

អណ្តាតភ្លើងឧស្ម័នទាំងអស់សុទ្ធតែបំពុលខ្យល់ និងអាចបង្កបញ្ហាសុខភាពផ្សេង។ ប៉ុន្តែ អណ្តាតភ្លើងឧស្ម័នខ្លះ មានគ្រោះថ្នាក់ជាង អណ្តាតភ្លើងឧស្ម័នខ្លះទៀត។

ឧស្ម័នអាចត្រូវបានដុតយូរៗម្តង ដើម្បីជាវិធានការសុវត្ថិភាពក្នុងការបង្ការការផ្ទុះ(ហៅថា អណ្តាតភ្លើងឧស្ម័នសុវត្ថិភាព), ឬត្រូវបានដុតរៀងរាល់ថ្ងៃដែលជាផ្នែកមួយនៃប្រតិបត្តិការប្រេង(ហៅថា អណ្តាតភ្លើងឧស្ម័នជាប្រចាំ)។ ប្រភេទ អណ្តាតភ្លើងឧស្ម័ននីមួយៗ ទាមទារការឆ្លើយតបខុសគ្នា។

អណ្តាតភ្លើងឧស្ម័នសុវត្ថិភាព

រោងចក្រស្លប្រេងដុតអណ្តាតភ្លើងឧស្ម័នសុវត្ថិភាពដើម្បីបន្ថយសម្ពាធនៅពេលមានឧស្ម័នច្រើនពេកនៅក្នុងបំពង់បង្ហូរប្រេង។ ទោះបីវាមិនកើតឡើងរាល់ពេលក៏ដោយ ការដុតបែបនេះនៅពេលគ្រោះថ្នាក់យ៉ាងខ្លាំង! ប្រសិនបើមានការដុតអណ្តាតភ្លើងឧស្ម័នសុវត្ថិភាពនៅក្នុងសហគមន៍របស់អ្នក គួរទាមទារឲ្យក្រុមហ៊ុនបញ្ជាក់ឲ្យដឹងជាមុនថាអណ្តាតភ្លើងឧស្ម័ននឹងកើតឡើងនៅពេលណា។ ក្រុមហ៊ុនគួរតែផ្តល់សញ្ញាព្រមានជាមុនជានិច្ច ដល់សហគមន៍ជិតខាង រយៈពេល២៤ម៉ោងមុននឹងដុតឧស្ម័ន។

នៅពេលមានអណ្តាតភ្លើងឧស្ម័ន មនុស្សគ្រប់គ្នាគួរស្ថិតនៅឲ្យឆ្ងាយពីទីនោះ។ ចូលក្នុងផ្ទះ រួចបិទទ្វារនិងបង្អួចឲ្យជិត។ (សម្រាប់ព័ត៌មានបន្ថែមអំពីអ្វីដែលត្រូវធ្វើក្នុងពេលមានអាសន្ន សូមមើលនៅពេលមានអណ្តាតភ្លើងឧស្ម័ន)។

អណ្តាតភ្លើងឧស្ម័នជាប្រចាំ

នៅកន្លែងខ្លះ ឧស្ម័នត្រូវបានដុតជារៀងរាល់ថ្ងៃ ព្រោះធ្វើបែបនេះក្រុមហ៊ុននឹងមិនចំណាយប្រាក់ច្រើន។ វាពិតជាពិបាកណាស់ដែលតម្រូវឲ្យប្រជាជនរស់នៅក្បែរអណ្តាតភ្លើងឧស្ម័នជាប្រចាំ អនុវត្តការប្រុងប្រយ័ត្នបានគ្រប់ពេលនោះ។ វិធីតែមួយគត់ដើម្បីទទួលបានសុវត្ថិភាពពីអណ្តាតភ្លើងឧស្ម័នជាប្រចាំ គឺត្រូវបញ្ឈប់វា។

យើងអាចបញ្ឈប់អណ្តាតភ្លើងឧស្ម័នបាន!

អណ្តាតភ្លើងឧស្ម័នដែលធ្ងន់ធ្ងរក្នុងពិភពលោក បានកើតឡើងជាច្រើនឆ្នាំនៅតំបន់ដីសណ្តទន្លេនីហ្សេ ក្នុងប្រទេសនីហ្សេរីយ៉ា។ អណ្តាតភ្លើងឧស្ម័នដែលដុតដោយក្រុមហ៊ុនប្រេងអន្តរជាតិនានាក្នុងប្រទេសនីហ្សេរីយ៉ា បានបំផ្លាញជីវិតមនុស្សជាច្រើន។ ហើយសារធាតុពុលដែលបានបញ្ចេញដោយអណ្តាតភ្លើងឧស្ម័នក្នុងប្រទេសនីហ្សេរីយ៉ា បានរួមចំណែកយ៉ាងច្រើនក្នុងការប្រែប្រួលអាកាសធាតុ និងការឡើងកម្តៅផែនដី ច្រើនជាងការរួមបញ្ចូលគ្នានៃប្រភពទាំងអស់ក្នុងភូមិភាគសាហារាទៅទៀត។

បុរសម្នាក់ឈ្មោះថា អ៊ីបេកវូរ៉ា មកពីរដ្ឋរីវវឺស្តេត នៃប្រទេសនីហ្សេរីយ៉ា បាននិយាយថា ៖ “ជាច្រើនឆ្នាំមកហើយ យើងបានរស់នៅជាមួយអណ្តាតភ្លើងឧស្ម័នដែលដុតជាបន្តបន្ទាប់ឥតដាច់។ ដីស្រែចម្ការរបស់យើងត្រូវបានបំពុល។ យើងប្រឹងប្រែងធ្វើស្រែចម្ការយ៉ាងខ្លាំង ប៉ុន្តែទទួលបានទិន្នផលតិចតួច។ ដំបូលផ្ទះរបស់យើងសឹកជាបន្តបន្ទាប់។ ខ្យល់របស់យើងក៏ត្រូវបានបំពុល។ កូនៗរបស់យើងមានជំងឺ។ សូម្បីតែទឹកភ្លៀងដែលយើងផឹក ក៏ប្រឡាក់ជាមួយលម្អងផ្សែងខ្មៅៗនៃអណ្តាតភ្លើងឧស្ម័នដែរ។ យើងមិនអាចបន្តរស់នៅយ៉ាងវេទនាបែបនេះទៀតទេ។

បន្ទាប់ពីការតស៊ូនិងតវ៉ាប្រឆាំងជាច្រើនឆ្នាំមក នៅឆ្នាំ២០០៥ អណ្តាតភ្លើងឧស្ម័នត្រូវបានចាត់ទុកថាខុសច្បាប់នៅក្នុងតំបន់ដីសណ្តទន្លេនីហ្សេ។ ចៅក្រមម្នាក់ចេញបញ្ជាថា រាល់ក្រុមហ៊ុនប្រេងទាំងអស់នៅក្នុងប្រទេសនីហ្សេរីយ៉ាត្រូវតែបញ្ឈប់ការដុតអណ្តាតភ្លើងឧស្ម័នជាបន្ទាន់ ព្រោះវាបង្កបញ្ហាសុខភាពយ៉ាងធ្ងន់ធ្ងរ ហើយវារំលោភលើសិទ្ធិក្នុងការទទួលបានបរិស្ថានសុខភាព។

ក្រុមហ៊ុនបដិសេធមិនជជែកជាមួយយើងអំពីអណ្តាតភ្លើងឧស្ម័នទេ។ អ៊ីចឹងតើយើងអាចជជែកជាមួយអ្នកណាទៀត?

ប្រសិនបើមានអណ្តាតភ្លើងឧស្ម័ននៅក្បែរអ្នក ៖

• ពិភាក្សាអំពីគ្រោះថ្នាក់នៃអណ្តាតភ្លើងឧស្ម័ន និងបង្កើតគណៈកម្មាធិការមួយដើម្បីប្តឹងតវ៉ាទៅក្រុមហ៊ុននិងមន្ត្រីរដ្ឋាភិបាល។ ម្យ៉ាងទៀត គួរជជែកជាមួយបុគ្គលិកសុខភាព អ្នកសារព័ត៌មាន និងអង្គការមិនមែនរដ្ឋាភិបាលនានា។
• កត់ត្រាព័ត៌មានផ្សេងៗនៃយុទ្ធនាការរបស់អ្នក។ លើកទឹកចិត្តប្រជាជនឲ្យកត់ត្រាពីពេលវេលានៃអណ្តាតភ្លើងឧស្ម័ន ព្រមទាំងបញ្ហាផ្សេងៗដែលវាបង្កឡើង។
• រៀបចំការប្រជុំដើម្បីចែករំលែកពីកំណត់ត្រាទាំងនេះជាមួយសហគមន៍ដទៃ អ្នកសារព័ត៌មាន និងមន្ត្រីរដ្ឋាភិបាល។ កត់ត្រាអំពីការពិភាក្សារបស់អ្នកជាមួយពួកគេ។ ការកត់ត្រាទុកឬថតវីដេអូនូវអ្វីដែលមន្ត្រីរដ្ឋាភិបាលបាននិយាយ នឹងបង្ហាញថាអ្នកពិតជាយកចិត្តទុកដាក់នឹងបញ្ហានេះខ្លាំងណាស់។ សំខាន់បំផុត គឺមិនត្រូវចុះចាញ់ឡើយ!

សកម្មភាពទាំងនេះប្រហែលមិនអាចបញ្ឈប់អណ្តាតភ្លើងឧស្ម័នភ្លាមៗទេ។ ប៉ុន្តែគោលដៅរួមនៃការបញ្ឈប់អណ្តាតភ្លើងឧស្ម័ន អាចបង្រួបបង្រួមសហគមន៍ និងបង្កើនភាពរឹងមាំ ដើម្បីការពារសុខភាពមនុស្សគ្រប់គ្នាក្នុងពេលយូរអង្វែង។