ហេតុអ្វីមនុស្សកាន់តែច្រើន មានជំងឺទឹកនោមផ្អែម

វិគី ព័ត៌មាន សុខភាព > ទីណាគ្មានវេជ្ជបណ្ឌិត ថ្មី > ជំងឺទឹកនោមផ្អែម > ហេតុអ្វីមនុស្សកាន់តែច្រើន មានជំងឺទឹកនោមផ្អែម

ក្នុង​ជំពូក​នេះ

 

ក្នុង​ជំពូក​នេះ

កាលពីមុន ជំងឺទឹកនោមផ្អែម និងបញ្ហាបេះដូង ដូចជាជំងឺលើសឈាម ច្រើនតែកើតលើមនុស្សនៅក្នុងប្រទេសអ្នកមានប៉ុណ្ណោះ។ សព្វថ្ងៃនេះ ប្រទេសដែលមានប្រាក់ចំណូលទាប ក៏មានបញ្ហាទាំងនេះផងដែរ។ វាកើតឡើងនៅពេលដែលរបៀបរស់នៅបែបបុរាណ បានផ្លាស់ប្តូរ ហើយគ្រួសារជាច្រើនបានបែកបាក់។ អាហារថ្មីៗ សារធាតុគីមីថ្មីៗ ការងារថ្មីៗ និងរបៀបរស់នៅថ្មីៗ បានផ្លាស់ប្តូររបៀបដែលមនុស្សយើងបរិភោគអាហារ និងរយៈពេលធ្វើលំហាត់ប្រាណ។ ការផ្លាស់ប្តូរទាំងនេះមួយចំនួន ហាក់ដូចជាធ្វើឲ្យជីវិតកាន់តែងាយស្រួល ប៉ុន្តែវាក៏បង្កើនការប្រឈមនឹងជំងឺទឹកនោមផ្អែម និងជំងឺរ៉ាំរ៉ៃផ្សេងៗទៀតផងដែរ។ រៀងរាល់ឆ្នាំ មនុស្សកាន់តែច្រើន កើតជំងឺទឹកនោមផ្អែម ហើយកើតនៅលើវ័យកាន់តែក្មេងថែមទៀត។

ពេលទៅដល់ផ្ទះវិញ វាយប់បាត់ទៅហើយ ដូច្នេះខ្ញុំទិញអាហារស្រាប់ៗទើបងាយស្រួលជាង។

អាហារនេះធ្វើឲ្យខ្ញុំឆ្អែតបាន ហើយវាមិនសូវថ្លៃប៉ុន្មានទេ ដូច្នេះយើងអាចញ៉ាំនៅទីនេះរៀងរាល់ថ្ងៃ!

ជាញឹកញាប់ ប្រភេទការងារដែលពលរដ្ឋមាន ឬជីវិតទូទៅក្នុងទីក្រុង គឺមានន័យថាពួកគេមិនត្រូវដើរច្រើននោះទេ។ ពួកគេក៏ប្រហែលជាអង្គុយធ្វើការស្ទើររាល់ថ្ងៃ ឬបរិភោគអាហារកែច្នៃឬអាហាររោងចក្រផងដែរ។ .

ទីកន្លែងថ្មី បញ្ហាថ្មី

កាលពី១០ឆ្នាំមុន អាមីលកា(Amilcar) និងសេរីណា(Serena) បានចាកចេញពីភូមិរបស់ពួកគាត់ដើម្បីស្វែងរកការងារធ្វើនៅទីក្រុង។

បច្ចុប្បន្ន ជីវិតរបស់ពួកគាត់ហាក់ដូចជាងាយស្រួលជាងមុន។ ជំនួសឲ្យការជីកគាស់កាយ ដាំដុះពេញមួយថ្ងៃ ឥឡូវនេះសេរីណាធ្វើការនៅរោងចក្រ។ នាងអង្គុយដេរពេញមួយថ្ងៃ។ អាមីលកាធ្វើការងារជូតសម្អាតកម្រាលទីធ្លានៅឯស្ថានីយរថភ្លើងមួយ។

កាលពីនៅភូមិ ពួកគេដើរគ្រប់ទីកន្លែង។ ការដើរនៅទីក្រុង មានគ្រោះថ្នាក់ ដូច្នេះពួកគេជិះរថយន្តក្រុងជំនួស។ អាមីលកាធ្លាប់លេងបាល់ទាត់នៅពេលព្រលប់។ ឥឡូវនេះគាត់ច្រើនតែទៅរង្គសាល សម្រាកមើលកីឡានៅលើទូរទស្សន៍វិញ។

អាហាររបស់ពួកគាត់ក៏បានផ្លាស់ប្តូរផងដែរ។ ជំនួសឲ្យការបរិភោគអាហារដែលពួកគាត់បានដាំដុះ ឥឡូវនេះពួកគាត់ទិញអាហារស្រាប់ និងភេសជ្ជៈផ្អែមតាមផ្សារ ឬអាហារកញ្ចប់ពីហាងទំនិញ។ អាហារទាំងនេះមានរសជាតិឆ្ងាញ់។ ពួកគាត់អាចបរិភោគវាយ៉ាងឆាប់រហ័សនិងងាយស្រួល។ ប៉ុន្តែអាហារកែច្នៃទាំងនេះភាគច្រើនមានជាតិស្ករខ្ពស់ និងប្រើសុទ្ធតែសារធាតុគីមី។

សេរីណា និងអាមីលកា សុទ្ធតែដុះក្បាលពោះ។ សាច់ដុំរបស់ពួកគេមិនមាំមួនដូចពេលនៅធ្វើចម្ការនោះទេ។ នៅពេលពិនិត្យរកមើលជំងឺទឹកនោមផ្អែម កម្រិតជាតិស្កររបស់អាមីលកា ស្ថិតនៅខ្ពស់បន្តិចបន្តួច រីឯសេរីណាមានជំងឺទឹកនោមផ្អែមរួចទៅហើយ ព្រមទាំងមានការឈឺចាប់សរសៃប្រសាទនៅប្រអប់ជើងរបស់នាងទៀតផង។

បុគ្គលិកសុខាភិបាលនៅឯកន្លែងពិនិត្យ បានជួយសេរីណាឲ្យរៀបចំផែនការដើររហ័ស ជុំវិញរោងចក្រជាមួយមិត្តរួមការងាររៀងរាល់ថ្ងៃ នៅពេលបាយថ្ងៃត្រង់។ គាត់បានណែនាំឲ្យអាមីលកាផឹកទឹកនៅឯស្ថានីយរថភ្លើង ជំនួសភេសជ្ជៈផ្អែម។

នៅផ្ទះ ពួកគេនឹងចម្អិនអាហារដោយប្រើបន្លែស្រស់ដែលទិញពីផ្សារ។ ពួកគាត់សង្ឃឹមថាការផ្លាស់ប្តូរនេះនឹងជួយគ្រប់គ្រងជំងឺទឹកនោមផ្អែមបាន។

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ៣០ មករា ២០១៨