Hesperian Health Guides
ថ្នាំសម្លាប់សត្វល្អិតបង្កគ្រោះថ្នាក់ដល់បរិស្ថាន
វិគី ព័ត៌មាន សុខភាព > សៀវភៅណែនាំសម្រាប់សហគមន៍ស្តីអំពីសុខភាពបរិស្ថាន > ១៤. ថ្នាំសម្លាប់សត្វល្អិតគឺជាថ្នាំពុល > ថ្នាំសម្លាប់សត្វល្អិតបង្កគ្រោះថ្នាក់ដល់បរិស្ថាន
ថ្នាំសម្លាប់សត្វល្អិតបំពុលសត្វនៅពេលវាស៊ី ផឹក ឬដកដង្ហើមចូល ដូចគ្នានឹងការបំពុលមនុស្សដែរ។ ថ្នាំសម្លាប់សត្វល្អិតប្រមូលផ្តុំនៅក្នុងខ្លួនរបស់សត្វទាំងនោះ ហើយនៅពេលសត្វធំៗស៊ីសត្វតូចៗ បរិមាណនៃជាតិពុលក៏កើនឡើងដែរ។
ថ្នាំសម្លាប់សត្វល្អិតបំពុលដី នៅពេលវាសម្លាប់សត្វល្អិត ដង្កូវ មេរោគផ្សិត និងបាក់តេរីដែលបង្កើតសារធាតុចិញ្ចឹមសម្រាប់ធ្វើឲ្យដីមានជីជាតិ។
ថ្នាំសម្លាប់សត្វល្អិតបំពុលទឹក នៅពេលវាហូរចូលទៅក្នុងខ្សែទឹក។ វាសម្លាប់ត្រី និងបង្កគ្រោះថ្នាក់ដល់សត្វនិងមនុស្សដែលផឹកទឹកនោះ។
ថ្នាំសម្លាប់សត្វល្អិតបំពុលខ្យល់ នៅពេលវារសាត់អណ្តែតក្នុងខ្យល់។ ថ្នាំសម្លាប់សត្វល្អិតអាចហោះហើរច្រើនគីឡូម៉ែត្រពីកន្លែងដែលប្រើប្រាស់វា។
របៀបដែលសត្វល្អិតក្លាយជាធន់នឹងថ្នាំ |
 |
| ថ្នាំសម្លាប់សត្វល្អិតសម្លាប់សត្វល្អិតស្ទើរតែទាំងអស់ ប៉ុន្តែមានខ្លះនៅរស់ ព្រោះវាធន់នឹងថ្នាំ។ |
 |
| សត្វល្អិតដែលនៅរស់ បង្កើតកូនចៅវាដែលធន់នឹងថ្នាំដែរ។ |
 |
| មិនយូរប៉ុន្មានសត្វល្អិតទាំងអស់ក៏ធន់នឹងថ្នាំ រួចថ្នាំសម្លាប់សត្វល្អិតក៏លែងមានប្រសិទ្ធភាព។ |
ការធន់នឹងថ្នាំសម្លាប់សត្វល្អិត
ជាទូទៅតែងតែមានសត្វល្អិតពីរបីដែលមិនងាប់ទេនៅពេលគេបាញ់ថ្នាំលើវា ព្រោះពួកវាខ្លាំងជាងថ្នាំ ឬមានសារធាតុគីមីក្នុងខ្លួនដែលបង្ឃាំងថ្នាំសម្លាប់សត្វល្អិត។ ពួកវាកើតកូនមកមានកម្លាំងខ្លាំងដូចគ្នា និងមិនចាញ់ថ្នាំសម្លាប់សត្វល្អិតទេ។ នេះហៅថា ការធន់នឹងថ្នាំសម្លាប់សត្វល្អិត។ សត្វល្អិតកាន់តែច្រើន កើតមកដោយមានភាពធន់ ដែលធ្វើឲ្យសត្វល្អិតក្នុងប្រទេសនេះទាំងអស់ លែងអាចសម្លាប់បានដោយសារធាតុគីមីដដែលទៀត។
បន្ទាប់មកក្រុមហ៊ុនថ្នាំសម្លាប់សត្វល្អិត ក៏បង្កើតថ្នាំសម្លាប់សត្វល្អិតប្រភេទថ្មីដែលខ្លាំងជាងមុន អាចសម្លាប់សត្វល្អិតដែលធន់បាន។ កសិករទិញសារធាតុគីមីថ្មីនេះ ធ្វើឲ្យចំណាយកាន់តែច្រើនពីមួយឆ្នាំទៅមួយឆ្នាំ។ ជារៀងរាល់ឆ្នាំ បរិស្ថានត្រូវបានបំពុលដោយសារធាតុគីមីកាន់តែច្រើន, សត្វល្អិតកាន់តែច្រើនបានធន់នឹងថ្នាំ, ហើយក្រុមហ៊ុនថ្នាំសម្លាប់សត្វល្អិតរកចំណូលបានកាន់តែច្រើន។
ខណៈដែលថ្នាំសម្លាប់សត្វល្អិតអាចកាត់បន្ថយការបាត់បង់ដំណាំដោយសារសត្វល្អិតក្នុងរយៈពេលពីរបីរដូវកាលដំបូង ក្នុងរយៈពេលយូរថ្នាំនេះបំពុលមនុស្ស សត្វ ដី និងទឹក។ ផលប្រយោជន៍យូរអង្វែងតែមួយគត់ ធ្លាក់ទៅលើក្រុមហ៊ុនថ្នាំសម្លាប់សត្វល្អិតដែលផលិតនិងលក់ថ្នាំទាំងនេះ។
ថ្នាំសម្លាប់សត្វល្អិត សម្លាប់សត្វល្អិតមានប្រយោជន៍
មិនមែនសត្វល្អិតទាំងអស់សុទ្ធចង្រៃទេ។ មានសត្វល្អិតជាច្រើនមានប្រយោជន៍ចំពោះកសិករ។ សត្វឃ្មុំរោយលម្អងលើរុក្ខជាតិ និងផលិតទឹកឃ្មុំ។ សត្វអណ្តើកមាសសម្លាប់សត្វល្អិតចង្រៃដែលបំផ្លាញដំណាំ។ សត្វល្អិតមានប្រយោជន៍ មានច្រើនជាងសត្វល្អិតចង្រៃ។ ប៉ុន្តែជាទូទៅថ្នាំសម្លាប់សត្វល្អិតសម្លាប់ទាំងសត្វល្អិតល្អ ទាំងសត្វល្អិតអាក្រក់។
ឧទាហរណ៍ នៅពេលគេបាញ់ថ្នាំលើចម្ការមួយដើម្បីសម្លាប់សត្វសង្កើចឈើ ថ្នាំពុលក៏សម្លាប់ទាំងពីងពាងនិងអណ្តើកមាសដែលស៊ីសត្វសង្កើចឈើដែរ។ នៅពេលគ្មានពីងពាងនិងអណ្តើកមាសគ្រប់គ្រងសត្វសង្កើចឈើ វាក៏កើតមានកាន់តែច្រើន។