Hesperian Health Guides
ពេលដែលរ៉ែបិទទ្វារ
វិគី ព័ត៌មាន សុខភាព > សៀវភៅណែនាំសម្រាប់សហគមន៍ស្តីអំពីសុខភាពបរិស្ថាន > ២១. ការជីករ៉ែ និងសុខភាព > ពេលដែលរ៉ែបិទទ្វារ
នៅពេលអណ្តូងរ៉ែបានបិទ ម្ចាស់ការដ្ឋានរ៉ែ, ដោយមានការត្រួតត្រាមើលពីអាជ្ញាធររ៉ែរដ្ឋាភិបាល, ទទួលខុសត្រូវលើការស្តារទីកន្លែងឡើងវិញដើម្បីឲ្យមានសុវត្ថិភាពសម្រាប់ការប្រើប្រាស់ទៅថ្ងៃអនាគត។ ក្រុមហ៊ុនរ៉ែ និងអ្នកប្រតិបត្តិការរ៉ែគួរតែ ៖
- លុបបំបាត់សារធាតុពុល គ្រឿងម៉ាស៊ីន និងរចនាសម្ព័ន្ធការជីករ៉ែ។
- បំពេញរណ្តៅ បិទរូងចូលក្នុងដី ធ្វើរបងព័ទ្ធតំបន់គ្រោះថ្នាក់ និងដាក់សញ្ញាសម្គាល់ច្បាស់លាស់នៅតំបន់ទាំងនេះ។
- ធ្វើឲ្យមានស្ថិរភាពនូវទីចំណោត ទ្រនាប់រណ្តៅ និងកន្លែងចោលកាកសំណល់ ដើម្បីកាត់បន្ថយសំណឹក និងការបាក់ស្រុត។
- កែប្រែដីឡើងវិញ និងគ្របដណ្តប់តំបន់នោះដោយស្រទាប់ដីមានជីជាតិនិងរុក្ខជាតិ។
- កែប្រែផ្លូវទឹកដែលខូចខាតឡើងវិញ។
ក្នុងប្រទេសខ្លះ ក្រុមហ៊ុនរ៉ែត្រូវបានតម្រូវឲ្យដាក់ប្រាក់ដំកល់(ហៅប្រាក់ធានា) មុនពេលពួកគេចាប់ផ្តើមការងារ។ ប្រាក់ធានាមានប្រសិទ្ធភាពលុះត្រាតែវាមានចំនួនគ្រប់គ្រាន់ដើម្បីបង្ការមិនឲ្យក្រុមហ៊ុនបង្កគ្រោះថ្នាក់ច្រើនពេក។ ប្រសិនបើចំនួននៃប្រាក់ធានា តិចជាងតម្លៃនៃការកែប្រែដីឡើងវិញ និងបង់ថ្លៃចំពោះការខូចខាតពីការជីករ៉ែ នោះក្រុមហ៊ុនអាចនឹងមិនបំពេញតាមការទទួលខុសត្រូវរបស់ខ្លួន។ ដើម្បីប្រាកដថា ក្រុមហ៊ុនបំពេញតាមការទទួលខុសត្រូវរបស់ខ្លួន សហគមន៍ខ្លះចរចារឲ្យមានប្រាក់ធានាយ៉ាងខ្ពស់បំផុត។ ជាការប្រសើរ គួរទាមទារឲ្យមានប្រាក់ធានារួមមួយសម្រាប់គម្រោងទាំងមូល ជាជាងប្រាក់ធានាតូចតាចសម្រាប់ផ្នែកតូចនីមួយៗរបស់គម្រោង។
ការកែប្រែដីខូចខាតឡើងវិញ
|
| បន្ទាប់ពីការជីករ៉ែ និងមុនពេលកែប្រែដីឡើងវិញ |
ប្រសិនបើដីបានខូចខាតដោយសារសំណឹក និងបាត់បង់ស្រទាប់ដីខាងលើ វាអាចកែប្រែឡើងវិញក្នុងពេលវេលាមួយ។ ប៉ុន្តែបើដីត្រូវបានខូចខាតយ៉ាងធ្ងន់ធ្ងរដោយសារកាកសំណល់រ៉ែ និងសារធាតុគីមី គឺអាចមានការពិបាកយ៉ាងខ្លាំងក្នុងការកែប្រែឡើងវិញ។
ការកែប្រែដី និងការដាំដើមឈើឡើងវិញលើដីដែលខូចខាត គួរតែជាការទទួលខុសត្រូវរបស់ម្ចាស់រ៉ែនិងអ្នកប្រតិបត្តិរ៉ែ។ ប៉ុន្តែសហគមន៍ជីករ៉ែ ទោះបីមានឬគ្មានការគាំទ្រពីរដ្ឋាភិបាលក៏ដោយ ត្រូវតែដាក់សម្ពាធលើក្រុមហ៊ុនរ៉ែ ដើម្បីប្រាកដថាពួកគេបំពេញតាមការទទួលខុសត្រូវរបស់ខ្លួន។
ដើម្បីកែប្រែនិងដាំដើមឈើឡើងវិញនៅលើដីដែលបានជីករ៉ែ ត្រូវតែបង្ការកាកសំណល់ពុលមិនឲ្យហូរដាច់ឬហុយក្នុងខ្យល់ ហើយក៏ត្រូវតែបង្ការការបង្ហូរអាស៊ីតរ៉ែផងដែរ។ ដើម្បីឲ្យដីវិលត្រឡប់មកស្ថានភាពល្អឡើងវិញ វាត្រូវការកិច្ចការជាច្រើនក្នុងរយៈពេលជាច្រើនឆ្នាំ។
ប្រសិនបើមិនអាចជីករ៉ែដោយសុវត្ថិភាព និងដោយមានការទទួលខុសត្រូវតែ ដូច្នេះមិនគួរប្រតិបត្តិការជីករ៉ែសោះឡើយ។
|
| រុក្ខជាតិដុះពេញលេញក្នុងរយៈពេល២០ឆ្នាំបន្ទាប់ពីការដាំឡើងវិញ |