មេរោគ West Nile

វិគី ព័ត៌មាន សុខភាព > ទីណាគ្មានវេជ្ជបណ្ឌិត ថ្មី > ជំងឺគ្រុនចាញ់ ជំងឺគ្រុនឈាម និងជំងឺដទៃទៀតដែលកើតពីសត្វមូស > មេរោគ West Nile

ក្នុង​ជំពូក​នេះ

 

ក្នុង​ជំពូក​នេះ

មូសនេះបង្កាត់ពូជក្នុងវាលភក់ ទឹកដក់ ឬទឹកកខ្វក់។

មេរោគ West Nile ត្រូវបានចម្លងរាលដាលដោយមូស Culex ។ មូសទាំងនេះមានទំហំមធ្យម ពណ៌ត្នោត និងមានគំនូសសៗនៅលើពោះ។ នៅពេលថ្ងៃ ពួកវាសំងំនៅក្នុងនិងជុំវិញផ្ទះ និងសំណង់ផ្សេងៗ និងនៅក្បែររុក្ខជាតិនិងបន្លែ។ ក្អែក សត្វស្លាបផ្សេងទៀត និងសេះ ជាអ្នកផ្ទុកមេរោគ West Nile ។ សត្វមូស ខាំសត្វដែលបានឆ្លងមេរោគ បន្ទាប់មកខាំមនុស្ស ដែលធ្វើឲ្យឆ្លងមេរោគនិងជំងឺ។

រោគសញ្ញានៃមេរោគ West Nile

មនុស្សភាគច្រើនដែលបានឆ្លងមេរោគ West Nile មិនមានរោគសញ្ញាទេ ហើយប្រហែលជាមិនដឹងខ្លួនថាមានជំងឺនេះដែរ។ ប៉ុន្តែប្រហែល ១ ក្នុងចំណោម ៥នាក់ដែលបានឆ្លងមេរោគ នឹងមានអារម្មណ៍ថាឈឺ ហើយអាចមានសញ្ញាទាំងនេះមួយចំនួន ៖

• គ្រុនក្តៅ
• ឈឺក្បាល
• មានអារម្មណ៍នឿយហត់គ្រប់ពេល (អស់កម្លាំងខ្លាំង)
• ឈឺខ្លួន
• ក្អួត
• កន្ទួលលើរាងកាយ
• ហើមកូនកណ្តុរ

ការព្យាបាល អាចជួយឲ្យអ្នកមានអារម្មណ៍ប្រសើរឡើង។

មេរោគ West Nile អាចក្លាយទៅជាធ្ងន់ធ្ងរ ទោះបីជាវាមិនមានញឹកញាប់ក៏ដោយ។ ទម្រង់ធ្ងន់ធ្ងរនៃមេរោគនេះ ប៉ះពាល់ដល់ខួរក្បាល។ មនុស្សវ័យចំណាស់ទំនងជាមានការវិវត្តទៅជាមេរោគ West Nile ធ្ងន់ធ្ងរ ជាងមនុស្សវ័យក្មេង។ ត្រូវស្វែងរកជំនួយពីគ្រូពេទ្យយ៉ាងឆាប់រហ័សចំពោះរោគសញ្ញាគ្រោះថ្នាក់ណាមួយ។

សញ្ញាគ្រោះថ្នាក់នៃមេរោគ West Nile ធ្ងន់ធ្ងរ

• រឹងក
• ញ័រ
• ខ្វិន (មិនអាចធ្វើចលនា)
• បាត់បង់ស្មារតី

ការបង្ការ

សត្វស្លាបដែលស្លាប់ និងសេះដែលឈឺ នៅក្នុងតំបន់មួយដែលមានវត្តមានមេរោគ West Nile គឺជាការព្រមានមួយដែលថាជំងឺប្រហែលជាចាប់ផ្តើមនៅលើមនុស្ស។ មានវ៉ាក់សាំងមួយសម្រាប់សេះ ដែលបង្ការពីមេរោគ West Nile ។ ដូច្នេះការចាក់វ៉ាក់សាំងឲ្យសេះ ក៏ការពារមនុស្សផងដែរ។ ជំងឺក្នុងទម្រង់នេះ ប៉ះពាល់ដល់ខួរក្បាល។ ម្យ៉ាងទៀត ត្រូវជៀសវាងកុំឲ្យមូសខាំ និង បង្ការកុំឲ្យមូសបង្កាត់ពូជ។

ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ០៦ ឧសភា ២០១៩