Hesperian Health Guides
បន្ទាប់ពីការរម្ងាប់មេរោគ
វិគី ព័ត៌មាន សុខភាព > សៀវភៅណែនាំសម្រាប់សហគមន៍ស្តីអំពីសុខភាពបរិស្ថាន > ១៩. កាកសំណល់នៃការថែទាំសុខភាព > បន្ទាប់ពីការរម្ងាប់មេរោគ
មាតិកា
ការរម្ងាប់មេរោគនិងការចោលសម្ភារៈមុតស្រួច
បញ្ហាសុខភាពជាច្រើនពីកាកសំណល់នៃការថែទាំសុខភាព គឺបណ្តាលមកពីសម្ភារៈមុតស្រួច។ ម្ជុល ឡាម កាំបិតវះកាត់ និងសម្ភារៈមុតស្រួចដទៃទៀត អាចបណ្តាលឲ្យមានរបួសឬឆ្លងរោគ ដូច្នេះត្រូវរៀបចំវាដោយប្រុងប្រយ័ត្នបំផុត។ នៅក្រៅមណ្ឌលសុខភាព សម្ភារៈមុតស្រួចអាចបង្កគ្រោះថ្នាក់ដល់អ្នកដែលប្រមូលនិងកែច្នៃកាកសំណល់។
ដើម្បីកាត់បន្ថយកាកសំណល់មុតស្រួច គួរចាក់ថ្នាំតែនៅពេលចាំបាច់ប៉ុណ្ណោះ។ (សម្រាប់ព័ត៌មានបន្ថែមអំពីពេលដែលគួរនិងមិនគួរចាក់ថ្នាំ សូមមើលសៀវភៅ ទីណាគ្មានវេជ្ជបណ្ឌិត នៅទំព័រ65ទៅ74)។
ការចោលម្ជុលនិងសឺរ៉ាំងឲ្យមានសុវត្ថិភាព
 |
បន្ទាប់ពីចាក់ថ្នាំ គួរដកម្ជុលចេញពីស៊ឺរ៉ាំង រួចដាក់វាក្នុងប្រអប់ដាក់សម្ភារៈមុតស្រួចវិញភ្លាម។ ការគ្របគម្របម្ជុលឡើងវិញ គឺជាការគ្រោះថ្នាក់ និងគួរតែចៀសវាង។ ត្រូវចោលម្ជុលនៅកន្លែងប្រើវាតែម្តង លើកលែងតែអ្នកកំពុងប្រើសឺរ៉ាំងដែលប្រើឡើងវិញបានប៉ុណ្ណោះ។ មានវិធីច្រើនយ៉ាងក្នុងការដកម្ជុលចេញពីសឺរ៉ាំង។ វិធីណាក៏ដោយ គួរតែ ៖
- ប្រើដៃតែម្ខាង ដើម្បីកុំឲ្យមុតម្ជុល។
- ចោលម្ជុលក្នុងប្រអប់រឹងមាំដែលមិនអាចចាក់ធ្លាយ។
- មានភាពងាយស្រួល និងសុវត្ថិភាពសម្រាប់បុគ្គលិកសុខាភិបាល។
វិធីធ្វើប្រអប់រន្ធដូចសោរ សម្រាប់ចោលសម្ភារៈមុតស្រួច
ប្រអប់រន្ធដូចសោរ គឺជាប្រអប់លោហៈមួយដែលមានរន្ធវែងនៅពីលើគម្រប ដែលចុងម្ខាងនៃរន្ធ មានទំហំធំ ហើយចុងម្ខាងទៀតនៃរន្ធ មានទំហំតូច។ អ្នកអាចរកទិញវា ឬឲ្យជាងដែកធ្វើវាឲ្យ។ វាក៏អាចធ្វើពីកំប៉ុងកាហ្វេ ឬប្រអប់លោហៈរឹងផ្សេងទៀតដែរ។ អ្វីដែលសំខាន់នោះគឺថា ប្រអប់នេះអាចឲ្យអ្នកដោះម្ចុលចេញពីសឺរ៉ាំងដោយមិនប៉ះពាល់ម្ជុលទេ។
- ១. នៅពេលអ្នកប្រើប្រាស់សឺរ៉ាំងដែលប្រើតែ១លើករួច ចូរដាក់ម្ជុលទៅក្នុងរន្ធ រួចអូសរំកិលទៅចុងម្ខាងដែលមានទំហំតូច។
- ២. ឥឡូវនេះ ចូរទាញសឺរ៉ាំង នោះម្ជុលនឹងធ្លាក់ចូលទៅក្នុងប្រអប់។ ដាក់សឺរ៉ាំងនៅក្នុងធុងកាកសំណល់។
- ៣.នៅពេលប្រអប់ដាក់សម្ភារៈមុតស្រួច ពេញបាន៣ភាគ៤ ចូរយកបង់ស្អិតបិតវាឲ្យជិត រួចចោលក្នុងរណ្តៅសម្ភារៈមុតស្រួច ឬក្នុងធុងធំដែលសម្រាប់កាកសំណល់មុតស្រួច។
ប្រភេទសឺរ៉ាំង
សឺរ៉ាំងដែលប្រើឡើងវិញបាន។ សឺរ៉ាំងប្រភេទនេះមិនសូវបង្កើតកាកសំណល់ និងអាចសន្សំប្រាក់ខ្លះ ប៉ុន្តែត្រូវតែលាងសម្អាតវាដោយប្រុងប្រយ័ត្ន និងរម្ងាប់មេរោគបន្ទាប់ពីប្រើប្រាស់រួច។ មិនត្រូវប្រើសឺរ៉ាំងដោយមិនលាងសម្អាតនិងរម្ងាប់មេរោគជាមុនឡើយ។ មេរោគអេដស៍ ជំងឺរលាកថ្លើម និងជំងឺដទៃទៀតអាចឆ្លងយ៉ាងងាយ ប្រសិនបើមិនរម្ងាប់មេរោគលើម្ជុលនិងសឺរ៉ាំងរៀងរាល់ពេលប្រើប្រាស់ទេ។
សឺរ៉ាំងដែលប្រើតែ១លើក ត្រូវបានផលិតឡើងសម្រាប់ចោលទាំងម្ជុលនៅជាប់វា បន្ទាប់ពីប្រើរួចមួយដង។ សឺរ៉ាំងដែលប្រើតែ១លើកខ្លះ អាចដោះចេញពីគ្នា ស្ងោរចំហុយរម្ងាប់មេរោគ និងប្រើប្រាស់ឡើងវិញបានពីរបីដង។ ការអនុវត្តបែបនេះ មិនត្រូវបានណែនាំទេ ព្រោះបើរម្ងាប់មេរោគលើសឺរ៉ាំងឬម្ជុលមិនបានទាំងស្រុងទេ វាអាចចម្លងជំងឺ។
សម្រាប់មធ្យោបាយចោលកាកសំណល់ដោយសុវត្ថិភាព សូមមើលការកប់កាកសំណល់នៃការថែទាំសុខភាព។
វិធីលាងសម្អាតនិងរម្ងាប់មេរោគលើសឺរ៉ាំងនិងម្ជុលសម្រាប់ប្រើប្រាស់ឡើងវិញ
ការប្រើម្ជុលលើសពី១ដង អាចចម្លងមេរោគអេដស៍ ឬជំងឺផ្សេងៗទៀត លុះត្រាតែលាងសម្អាតនិងរម្ងាប់មេរោគឲ្យបានត្រឹមត្រូវ ដូច្នេះគួរតែចៀសវាងធ្វើបែបនេះ។
ប៉ុន្តែសហគមន៍ជាច្រើនគ្មានលទ្ធភាពប្រើប្រាស់សឺរ៉ាំងនិងម្ជុលតែមួយលើករួចចោលទេ។ ដោយមូលហេតុនេះហើយ ទើបយើងបញ្ចូលព័ត៌មានអំពីវិធីលាងសម្អាតនិងរម្ងាប់មេរោគលើសឺរ៉ាំងនិងម្ជុលសម្រាប់ប្រើប្រាស់ឡើងវិញ។
- ១. ពាក់ស្រោមដៃក្រាស់ដើម្បីការពារដៃរបស់អ្នកពីមេរោគ។
- ២.បូមសូលុយស្យុងទឹកសាវែល៥% ចូលក្នុងបំពង់សឺរ៉ាំងតាមម្ជុល។
- ៣. បាញ់សូលុយស្យុងទឹកសាវែលចេញក្រៅ។
- ៤. ធ្វើឡើងវិញច្រើនដង។ លាងជម្រះដោយទឹកស្អាតឲ្យបានច្រើនដង។
- ៥. ដោះម្ជុលនិងសឺរ៉ាំងចេញពីគ្នា រួចស្ងោរឬចំហុយវា។
