បញ្ហានៃការដុតកាកសំណល់

វិគី ព័ត៌មាន សុខភាព > សៀវភៅណែនាំសម្រាប់សហគមន៍ស្តីអំពីសុខភាពបរិស្ថាន > ១៩. កាកសំណល់នៃការថែទាំសុខភាព > បញ្ហានៃការដុតកាកសំណល់

នៅក្នុងជំពូកនេ:

• ១៩. កាកសំណល់នៃការថែទាំសុខភាព
• បញ្ហាសុខភាពចេញពីកាកសំណល់នៃការថែទាំសុខភាព
• បញ្ហានៃការដុតកាកសំណល់
• ការបង្ការគ្រោះថ្នាក់ពីកាកសំណល់នៃការថែទាំសុខភាព
• ការរម្ងាប់មេរោគដោយប្រើសារធាតុគីមី
• ការរម្ងាប់មេរោគដោយប្រើកម្តៅ
• បន្ទាប់ពីការរម្ងាប់មេរោគ
• ការរម្ងាប់មេរោគនិងការចោលសម្ភារៈមុតស្រួច
• ការចោលកាកសំណល់ឆ្លង
• កម្មវិធីផ្តល់ថ្នាំបង្ការ
• ការកប់កាកសំណល់នៃការថែទាំសុខភាព
• ការចោលកាកសំណល់គីមីដោយសុវត្ថិភាព
• វាយតម្លៃកាកសំណល់នៃការថែទាំសុខភាព
• ដំណោះស្រាយសម្រាប់សហគមន៍

ដើម្បីបំផ្លាញកាកសំណល់នៃការថែទាំសុខភាព និងមេរោគដែលមានក្នុងវា គ្លីនិកនិងមន្ទីរពេទ្យជាច្រើនដុតវានៅក្នុងឡសំរាម។ ការដុតកាកសំណល់នៃការថែទាំសុខភាព ហាក់ដូចជាដំណោះស្រាយងាយស្រួល ព្រោះគ្រាន់តែប្រមូលកាកសំណល់ជាច្រើនប្រភេទ រួចបោះចូលក្នុងឡសំរាមប៉ុណ្ណោះ។ ប៉ុន្តែការដុតកាកសំណល់តាមរបៀបនេះ បង្កើតបញ្ហាសុខភាពច្រើនជាងអ្វីដែលវាដោះស្រាយទៅទៀត។

ការដុតកាកសំណល់, មិនថាដុតកណ្តាលវាល ឬក្នុងឡទេ, សុទ្ធតែបញ្ចេញសារធាតុគីមីពុលទៅក្នុងខ្យល់ ក្នុងទម្រង់ជាផ្សែង និងទៅក្នុងដីនិងទឹកក្រោមដី ក្នុងទម្រង់ជាផេះ។ កាកសំណល់ដែលមានជាតិបារត សំណ និងលោហៈធ្ងន់ដទៃទៀត បញ្ចេញសារធាតុពុលទាំងនេះទៅក្នុងបរិស្ថាននៅពេលដុត។

រៀងរាល់កាកសំណល់៣បាវដែលបានដុត	វាបង្កើតជាផេះពុល១បាវ ហើយសារធាតុគីមីពុលដទៃទៀតចូលទៅក្នុងខ្យល់ ដី និងទឹក។

ប្លាស្ទិកដែលប្រើសម្រាប់ផលិតថង់សេរ៉ូម និងថង់ឈាម, បំពង់ដាក់ឈាម, និងសឺរ៉ាំងមួយចំនួន បញ្ចេញសារធាតុគីមីពុលកម្រិតខ្ពស់(ហៅថាឌីអុកសាំង និងហ្វុយរ៉ាន) នៅពេលដុត។ សារធាតុគីមីទាំងនេះគ្មានពណ៌ ឬក្លិន និងអាចបង្កជំងឺមហារីក, ធ្វើស្ត្រីនិងបុរសគ្មានកូន, និងនាំឲ្យមានបញ្ហាសុខភាពធ្ងន់ធ្ងរដទៃទៀត(មើលជំពូក១៦ និងជំពូក២០)។

ជួនកាលឡសំរាមមិនត្រូវបានដុតក្តៅគ្រប់គ្រាន់ ឬយូរគ្រប់គ្រាន់ ដើម្បីដុតកាកសំណល់បានសព្វទេ។ ឡសំរាមខ្លះត្រូវបានសាងសង់ឡើងសម្រាប់ដុតកាកសំណល់ជាក់លាក់ ដូចជាកាកសំណល់នៃការផ្តល់ថ្នាំបង្ការ ប៉ុន្តែបែរជាត្រូវបានប្រើសម្រាប់ដុតថ្នាំពេទ្យ ថ្នាំសម្លាប់សត្វល្អិត និងសារធាតុពុលដទៃទៀតទៅវិញ។

ជាញឹកញាប់ ជំហានដំបូងៗក្នុងការរៀបចំកាកសំណល់នៃការថែទាំសុខភាពឲ្យមានសុវត្ថិភាព គឺត្រូវបែងចែកសម្ភារៈដែលអាចកែច្នៃ ឬប្រើប្រាស់ឡើងវិញបាន បន្ទាប់មករម្ងាប់មេរោគលើកាកសំណល់ដែលផ្ទុកមេរោគគ្រោះថ្នាក់។ តាមរយៈការប្រើប្រាស់មធ្យោបាយជំនួសការដុតសំរាមក្នុងឡ, ពាក្យសច្ចាប្រណិធានរបស់បុគ្គលិកសុខាភិបាលដែលថា “មិនបង្កគ្រោះថ្នាក់” នឹងអាចប្រើប្រាស់បានសូម្បីតែចំពោះកិច្ចការពិបាកៗនៃការចោលកាកសំណល់។