Hesperian Health Guides

មេរោគផ្សិត (Moniliasis, Candida, Thrush)

ខ្លឹមសារ​ត្រ​ង់ក​នែ្ល​ង​នេះ​គឺ​បាន​ពី ជំពូកជឿនលឿននៃសៀវភៅទីទីណាគ្មានវេជ្បណ្ឌិត

ក្នុង​ជំពូក​នេះ
NWTND sti Page 7-1.png

មេរោគផ្សិត ប៉ះពាល់ដល់ប្រដាប់ភេទ ហើយធ្វើឲ្យគេគិតថាវាជាជំងឺកាមរោគ ប៉ុន្តែជាធម្មតា មេរោគផ្សិត មិនឆ្លងតាមការរួមភេទនោះទេ។ តាមធម្មតា មេរោគផ្សិតមិនមានគ្រោះថ្នាក់ទេ ប៉ុន្តែអាចពិបាកក្នុងខ្លួនយ៉ាងខ្លាំង។ អ្នកងាយនឹងមានការបង្ករោគដោយមេរោគផ្សិតបំផុតនៅពេលមានផ្ទៃពោះ ពេលប្រើថ្នាំអង់ទីប៊ីយោទិក ឬមានជំងឺផ្សេងទៀតដូចជា ទឹកនោមផ្អែម ឬមេរោគអេដស៍។ មេរោគផ្សិតកើតឡើងញឹកញាប់បំផុតនៅលើស្ត្រី ប៉ុន្តែបុរសក៏អាចមានការបង្ករោគដោយមេរោគផ្សិតផងដែរ។ នៅលើបុរស វាអាចបណ្តាលឲ្យរលាកក្បាលលិង្គ និងរមាស់ពងស្វាស។ ទាំងបុរសនិងស្ត្រី សុទ្ធតែអាចមានមេរោគផ្សិតនៅបំពង់កដូចគ្នា។

មេរោគផ្សិតក៏អាចលេចឡើងនៅលើភ្លៅខាងក្នុង ក្លៀក នៅក្រោមសុដន់ ឬជុំវិញរន្ធគូថ។ មេរោគផ្សិតកើតឡើងញឹកញាប់បំផុតនៅកន្លែងដែលផ្នែកនៃរាងកាយ ប៉ះគ្នា ហើយមានការស្លៀកពាក់ជិត ដែលជាលក្ខខណ្ឌធ្វើឱ្យស្បែកមានសំណើមជានិច្ច។

រោគសញ្ញានៅលើស្ត្រី
  • សារធាតុដុំៗពណ៌ស ហូរចេញពីទ្វារមាស ដូចជាយ៉ាអ៊ួ
  • ស្បែកឡើងពណ៌ក្រហមភ្លឺ ខាងក្រៅនិងខាងក្នុងទ្វារមាស ហើយអាចហូរឈាម
  • មានអារម្មណ៍រមាស់ខ្លាំងនៅខាងក្នុងឬខាងក្រៅទ្វារមាស
  • ក្រហាយនៅពេលនោម
រោគសញ្ញានៅលើបុរស
  • សារធាតុខាប់ ពណ៌ស ជាប់នៅនឹងផ្នត់នៃស្បែកលិង្គ និងក្រោមស្បែកដែលគ្របចុងលិង្គ
  • ស្នាមកន្ទួលពណ៌ក្រហមនៅលើក្បាលលិង្គ
  • រមាស់ ក្រហាយ ឬឡើងក្រហមនៅលើលិង្គ ឬពងស្វាស
ស្ត្រីម្នាក់អង្គុយត្រាំទឹកនៅក្នុងចានដែក
ការព្យាបាល

ជួនកាល ការបង្ករោគដោយមេរោគផ្សិត នឹងបាត់ទៅវិញដោយមិនចាំបាច់ប្រើថ្នាំពេទ្យ។ ការព្យាបាលបែបធម្មជាតិ អាចកាត់បន្ថយភាពរមាស់។

 ស្ត្រីម្នាក់ដាក់ថ្នាំពេទ្យទៅក្នុងទ្វារមាស

ការព្យាបាលបែបធម្មជាតិ៖

ការលាងជម្រះសារធាតុរាវដោយទឹកស្អាត អាចជួយបាន។ ឬមួយលាយយ៉ាអ៊ូសុទ្ធ (មិនមានជាតិស្ករ ឬរសជាតិ) ឬទឹកខ្មេះ ¼ ពែង ក្នុងទឹកស្អាតក្តៅឧណ្ហៗមួយចានដែក ។ អង្គុយត្រាំក្នុងទឹកនេះរយៈពេល ២០ ទៅ ៣០នាទី។ បើវាជួយអ្នកឱ្យមានអារម្មណ៍ធូរស្រាល សូមធ្វើបែបនេះ ២ដងក្នុងមួយថ្ងៃ។

ឬមួយលាយទឹកខ្មេះ ៣ស្លាបព្រាបាយ ជាមួយទឹកឆ្អិនត្រជាក់ ១លីត្រ។ ត្រាំបន្ទះក្រណាត់សំឡីស្អាត ក្នុងទឹកលាយនេះ រួចស៊កចូលក្នុងទ្វារមាសរៀងរាល់យប់ រយៈពេល ៣យប់។ យកក្រណាត់សំឡីចេញនៅពេលព្រឹក។ បុរសអាចធ្វើដូចគ្នានេះដែរ រួចយកក្រណាត់សំឡីគ្របដណ្តប់លិង្គឬពងស្វាស។

ការព្យាបាលដោយថ្នាំពេទ្យ៖

ប្រើថ្នាំណាមួយក្នុងចំណោមនេះ៖

ថ្នាំទឹកពណ៌ស្វាយ Gentian នៅលើទ្វារមាស លិង្គ ឬពងស្វាស រៀងរាល់យប់ រយៈពេល ៧យប់

ថ្នាំក្រែម Miconazole, ថ្នាំក្រែម nystatin, ឬថ្នាំក្រែម ឬថ្នាំគ្រាប់ clotrimazole នៅលើឬក្នុងទ្វារមាស ឬលើលិង្គនិងពងស្វាស រៀងរាល់យប់ រយៈពេល ៧យប់។ ថ្នាំទាំងនេះមានសុវត្ថិភាពក្នុងការដាក់ក្នុងទ្វារមាសក្នុងអំឡុងពេលមានផ្ទៃពោះ។

បុរសប្រហែលជាត្រូវការពេលយូរជាងក្នុងការព្យាបាល។

ការបង្ការ

ស្លៀកពាក់ខាងក្រៅនិងខាងក្នុងឲ្យរលុងៗ ដើម្បីឱ្យខ្យល់ចូលដល់ប្រដាប់ភេទ។ បែបនេះជួយបង្ការមេរោគផ្សិត។ បោកគក់ឬប្តូរខោទ្រនាប់ឱ្យបានញឹកញាប់។ មិនត្រូវដាក់សាប៊ូទៅក្នុងទ្វារមាសទេនៅពេលងូតទឹក។ មិនត្រូវបាញ់ទឹកលាងទ្វារមាសទេ។ ប្រសិនបើអ្នកមានជំងឺទឹកនោមផ្អែមឬមេរោគអេដស៍ ការលេបថ្នាំបានត្រឹមត្រូវ និងការថែទាំសុខភាពរបស់អ្នក ជួយបង្ការបញ្ហាមេរោគផ្សិតបាន។


ទំព័រ​នេះ​ត្រូវ​បាន​​ធ្វើ​​បច្ចុប្បន្នភាព៖ ០៨ មិថុនា ២០១៩